Profesori i kriminalistikës, Ervin Karamuço, teksa ka komentuar operacionin e fundit në burgjet e vendit, ku përfunduan pas hekurave disa zyrtarë, zbuloi disa detaje të rënda. I ftuar në “ABC Live”, Karamuço përmendi një rast, ku një drejtor në burgun e Vaqarrit nxirrte të dënuarit, darkonte me ta dhe më pas i rikthente sërish në regjim. Profesori i kriminalistikës shtoi më tej se janë në dijeni edhe të dhënies së urdhrave për vrasje në burgje.
“Ne e dimë që janë dhënë urdhra për vrasje në burgje. Ne kemi edhe emërime nga burgjet shqiptare. Një eksponent ka marrë në telefon, pse jo edhe drejtues vendorë duke u thënë për vendet vakante, dy i dua unë për miqtë e mi.
Është diskutuar jo vetëm siguria e këtyre burgjeve. Ne kishim garanci se 41 Bis nuk do të prekej, ndërkohë që duke u thyer ky element i sigurisë, nuk bëjmë gjë tjetër veçse lejojmë këtë fenomen. Dikush prej tyre mund të ketë dalë nga burgu dhe të jetë kthyer prapë. Ka pasur raste vitet e kaluar, në Vaqarr ka qenë një rast që drejtori i nxirrte këta të dënuar, hanin darkë dhe më pas i kthenin pra në regjim”, deklaroi eksperti.
