Kryeministri Rama ka qenë sot në një takim me studentë në konviktet e Mjekësisë. Rama u është përgjigjur pyetjeve të studentëve lidhur me problematika të ndryshme të ngritura nga protesta studentore.
“Mark Markve duhet t’i bëni një pyetje, se kërkesat e studentëve lidhen me ata, me universitetin. Të gjitha këto që kërkoni ju duhet t’i bënin ata. Duhet t’i pyesni ata janë dakord për vlerësimin e titujve akademikë? E duan apo nuk e duan dhe jo të thonë po, por kur e duan e si i duan. Kush po i denigron pedagogët. Nuk kanë të drejtë studentët kur thonë që na shesin librat?!
Pyetja e dytë, duhet të na thonë janë dakord për shitjen e librave të pedagogëve?
Pyetja e tretë është a janë dakord apo jo që çdo vit studentët të bëjnë një vlerësim të performancës së pedagogëve?
A janë dakord ata që të vlerësohen nga ju? Aty do kuptohet se për çfarë e bëjnë grevën, e bëjnë për ju apo se s’duan. Për çfarë e kërkojnë abrogimin e ligjit. Ne duam t’u japim përgjigje kërkesave të studentëve një për një. Një pjesë e këtyre kërkesave janë për Universitetin. Duhet ta bëjnë pedagogët. Gjithë studentët më shkruajnë mua, ‘mos ua lër në dorë atyre’. Këta që bërtasin, dhe që bëjnë greva dhe që ulërijnë duhet të përgjigjen. Po e morët dot përgjigjen hajdeni më lajmëroni”, tha kryeministri.
Duke e përsëritur kërkesën e tij, Rama i cilësoi librat e pedagogëve, mizerabël.
“Për titujt akademikë, për librat që ju shesin, librat mizerabël, po e morët përgjigjen më lajmëroni dhe mua dhe pastaj jam unë prapë fajtori s’ka problem”, u shpreh Rama.
Më tej Kryemninistri vijoi duke u thënë studentëve të kthehen në shkollë, sepse do të rrezikojnë të humbasin vitin.
“Kaq pula jeni, ju. Do t’ju digjet viti po ju them. Lëre se cfarë thonë, që do djegim vitin, do bëhet mullar, kolaps dhe pastaj do lindë një jetë e re. Do t’ju digjet viti, ose do t’ju shtyhet . Dhe nëse mësimi nuk vazhdon do rrish prapë tek kjo dhoma në korrik dhe në gusht dhe ne nuk do kemi mundësi ta rregullojmë”. tha Rama.
