Bashkëshortja e shoferit të kamionit në të cilin u kapën 400 kilogramë kokainë në Lipjan të Kosovës, ka rrëfyer ngjarjen se si është arrestuar bashkëshorti i saj mëngjesin e djeshëm.
Në një intervistë për Klan Kosova”, ajo u shpreh se zyrtarët policorë po bastisnin shtëpinë, teksa ajo ka kërkuar nga ata arsyen e këtij kontrolli.
Ajo tregoi se bashkëshorti i cili po qëndronte me pranga në duar, i ka treguar se firma për të cilën punon, ka pasur parregullsi, gjë të cilën e kanë konfirmuar edhe policët në vendin e ngjarjes.
“Dy vetë kaluan për dritare bashkë me burrin, i ranë ziles dy herë i thashë hyn po nuk erdhi, kur dola i pashë disa persona, burrit ia kishin lidhë duart, ndërsa mu më thanë a keni diçka të jashtëligjshme i thashë jo, hyni mund të kontrolloni. Rreth 10 persona kontrolluan të gjitha dhomat, mua më thanë ulu dhe më pyetën sa para i ke, i thashë 400 euro aq sa i ka pru djali prej rrogës që ka marrë.
Pyetën se ku e kam dukatin, ia tregova, nisën me kontrollu por nuk e disha pse po ndodhë kjo, i pyeta dhe njëri nga ta më tha se ligj e kanë. Nuk kanë lënë vend pa kontrolluar në shtëpi… kur zbritën shkallëve në korridor, i pyeta se gjithë këtë kontroll e keni bërë, burri i ka duart e lidhura, a nuk bën unë si gruaja e tij ta dijë arsyen? Burri tha se unë flas veç një fjalë, e kanë zënë firmën gabim dhe për atë kanë ardhur të kotrollojnë. Ata e konfirmuan këtë gjë duke thënë se ai është shofer dhe e kemi për detyrë që ta kryejmë këtë kontroll”, ka thënë ajo.
Bashkëshortja e drejtuesit të kamionit, beson se burri i saj është plotësisht i pastër në këtë rast, ndërsa thotë se për punën që ai bën nuk ka rrogë fikse, por paguhet nga 80 euro.
“Jam e sigurt se është i pastër. Jam e sigurt sepse më rrogë ka punuar, është çuar herët, nuk është marrë me punë të këqija. Është i afërt me neve, nuk del nuk pi. 80 euro paguhet për një xhiro. Ky është vetëm vozitës, e afron aty për shkarkim kamionin, ky nuk prek aty. Është vetëm shofer, kush ngarkon, çfarë qet aty, ky nuk e di sepse është i blombuar”, ka deklaruar ajo.
Rrugëtimi i kokainës Brazil-Lipjan
Droga e nisur nga Brazili mbërriti më datën 6 maj në portin e Durrësit. Qëndroi 9 ditë dhe më datë 15 maj u lejua dalja e tij. U mbajt nën vëzhgim nga agjentët italianë dhe ata shqiptarë. Nga Durrësi vijoi rrugën për enë doganën e Morinit pa bërë asnjë ndalesë. Gjatë gjithë itinerarit, mjeti është ndjekur nga agjentët civilë. Kamioni u parkua në magazinën e kompanisë MC food në hyrje të qytetit të Lipjanit, e cila tregton dhe magazinon produkte ushqimore.
Në këto moment kanë ndërhyrë dhjetëra forca civile të policisë së tre shteteve ku dhe është sekuestruar sasia e kokainës. Janë në hetim 25 persona, kryesisht punonjës të kompanisë por vetëm 7 janë arrestuar. Ata janë të gjithë shqiptarë të Kosovës. Mediat italiane thonë se kokaina është e cilësisë së lartë dhe nëse do të hidhej në tregun europian, do të kishte sjellë mbi 100 milionë euro përfitim.