Policia Kufitare godet një tjetër rast të mosdeklarimit të të hollave në kufi.
Një 63 vjeçar tunizian u procedua penalisht, pasi gjatë kontrollit në aeroportin e Rinasit, iu gjetën 67,850 paund të padeklaruara.
Ai i kishte fshehur në çantën e tij të shpinës dhe në valixhe.
”Shërbimet e Policisë Kufitare në Rinas, si rezultat i shtimit të kontrolleve, me qëllim parandalimin dhe goditjen e paligjshmërisë, bazuar dhe në analizën e riskut, në hyrje të RSH-së, kanë kaluar për kontroll në vijën e dytë, shtetasin J. D., 63 vjeç, lindur në Tunizi dhe banues në Angli. Gjatë kontrollit të ushtruar, shtetasit të lartpërmendur, në çantën e tij të shpinës dhe në valixhe, shërbimet e Policisë Kufitare, i gjetën dhe sekuestruan në cilësinë e provës materiale 67850 paund’’, informon policia.
Në përfundim të veprimeve të para të kryera nga ana e seksionit të ZMP-së, shtetasi J. D. u procedua penalisht për veprën penale “Mosdeklarimi i të hollave dhe sendeve me vlerë në kufi”.
