Ish-deputeti i LSI Përparim Spahiu, ka reaguar në lidhje me faktin se Shqipëria mund t’i paguajë 100 milion euro kompanisë Kurum, për shkak të prishjes së njëanshme të kontratës për terminalin e kontenierëve në Portin e Durrësit.
Ai ironizon duke thënë edhe 100 të tjera, që duket se Shqipëria do t’i paguajë.
Sipas tij, abuzimeve të frikshme me financat publike me konçensione e PPP, me tendera të hapur e të fshehtë i shtohen dhe prishje kontratash e largime me dhunë biznesesh.
Për Spahiu, po jetojmë krizë të thellë ekonomike, shoqëruar me abuzime masive financiare të të gjitha llojeve.
Postimi i Spahiut në Facebook
Dhe 100 të tjera! Nuk është urim por miliona euro që duket se do ti paguhen kompanisë Kurum për prishje të njëanshme kontrate. Bëhet fjalë për atë të terminalit të kontenierëve në Portin e Durrësit.
Paralajmërimit të opozitës për kujdes me kontratat konçensionare, mazhoranca, si në çdo argument që ne kemi ngritur, i është përgjigjur me arogancë, tallje, pa treguar kujdesin më të vogël në vendimin për prishjen por edhe ndjekjen e këtyre çështjeve me probleme të rënda financiare.
Abuzimeve të frikshme me financat publike me konçensione e PPP, me tendera të hapur e të fshehtë, i shtohen dhe prishje kontratash e largime me dhunë biznesesh.
Borxht i lartë, papunësisë, korrupsionit, vendimeve abuzive me shkarkime të padrejta nga puna që i kushtojnë miliona buxhetit, fryrjes së administratës me punësime elektorale, i bashkohen dhe gjoba prishjesh kontratash, me qëllim apo jo, që po çojne ekonominë në kolaps total. Po jetojmë krizë të thellë ekonomike, shoqëruar me abuzime masive financiare të të gjitha llojeve.
