Pas 14 vitesh në arrati, policia italiane ka kapur mafiozin Marco Di Lauro. 37-vjeçari është prangosur të shtunën, në një apartament modest ku jetonte me gruan e tij në qytetin Chiaiano. Policia e ka gjetur atë të ulur bashkë me dy macet, duke ngrënë makarona. Në operacion ishin të përfshirë rreth 150 oficerë. Mediat italiane thonë se Marco Di Lauro është konsideruar si njeriu i dytë më i rrezikshëm në Itali, pas bosit mafioz siçilian Matteo Messina Denaro.
Akuzat
Marco Di Lauro ka qenë në kërkim, pasi mbi të rëndonte akuza për organizatë kriminale e tipit mafioz, dhe krime të tjera. Në vitin 2006 janë zhvilluar kërkime edhe në nivel ndërkombëtar.
Djali i katërt i bosit Paolo Di Lauro ishte në kërkim që nga 7 dhjetori 2004, kur ai i shpëtoi operacionit të policisë “nata e prangave”, në të cilin rreth një mijë agjentë pushtuan Scampian dhe Secondiglianon dhe ekzekutuan 53 urdhra arresti.
