Biznesmeni Lulzim Kulla, i cili në janar i shpëtoi atentatit me tritol, mësohet se është kapur në Kakavijë. Biznesmeni shkodran është prangosur në pikën e kalimit kufitar të Kakavijës, në tentativë për të kaluar drejt Greqisë, me pasaportë false. 42-vjeçari u ndalua ndërsa udhëtonte si pasagjer në një makinë tip AUDI dhe tentoi të kalojë drejt vendin fqinj, duke paraqitur një mjet identifikimi të falsifikuar.
Ai nuk ka bërë rezistencë gjatë momentit të ndalimit, ndërsa tashmë mbi të rëndon akuza e “falsifikimit të dokumenteve zyrtare”.
Kulla u vu në qendër të vëmendjes rreth 6 muaj më parë, kur i bënë atentat në qytetin e Shkodrës, me tritol.
Emri i biznesmenit Lulzim Kulla është mjaft i njohur për Policinë e Shkodrës. 42-vjeçari konsiderohet si një prej “të fortëve” të qytetit, dhe ka disa precedentë penalë.
Kulla konsiderohet si kreu i një grupi kriminal, që prej vitesh nënshtron tregtarët në Shkodër, duke u vendosur “tarifë” të përmuajshme për garantimin e objekteve tregtare. Historia e vendosjes së gjobave për tregtarët në lagjen “Rus” dhe në zonat përreth, daton që prej vitit 1997. Përmes presionit dhe terrorit, tregtarët detyrohen t’u paguajnë një shumë që shkon deri në 50 mijë lekë të vjetra në muaj grupit të të fortëve, në mënyrë që të mos kenë probleme.
Kulla njihet si një person i dhunshëm dhe se ka detyruar shumë biznese, që të mbyllin aktivitetin e tyre ndërsa shumë të tjerë, madje edhe janë detyruar që të largohen nga qyteti i Shkodrës.
