Policia ka zhvilluar një operacion anti-drogë gjatë natës në Kavajë, ku ka sekuestruar rreth 700 kg kanabis sativa (sasia u konfirmua nga Policia e Shtetit, pas një aludimi se ishin kapur 4 tonë).
Konkretisht, operacioni është zhvilluar rreth orës 01:00 të mëngjesit të sotëm në fshatin Bago të Kavajës.
Mësohet se policia është vënë në ndjekje të një furgoni dhe një makine tip fuoristradë plot me drogë, teksa këto të fundit ishin nisur drejt “Plazhit të Gjeneralit” për t’u transportuar në Itali.
Sapo kanë pikasur policinë, drejtuesit e mjeteve dhe shoqëruesit janë larguar.
Policia kishte ngritur prita në të gjithë zonën, ndërsa në një vend tjetër ka ndaluar 4 persona.
Dyshohet se droga ka ardhur nga një rreth tjetër, me qëllim që të shkonte drejt “Plazhit të Gjeneralit” dhe më pas të transportohej me mjete lundruese drejt Italisë. Operacioni është në zhvillim e sipër për kapjen e personave të tjerë të përfshirë në këtë trafik të drogës.
Burime konfidenciale për BW thanë se droga e kapur është peshuar gjatë gjithë natës në Komisariatin e Policisë së Kavajës dhe ka rezultuar 4 ton, sasia më e madhe e kapur ndonjëherë në Kavajë.
