I cilësuar si ‘i larguari i Berishës’, Gazmend Oketa tashmë është pjesë e Këshillit Kombëtar të PD. Në një intervistë për “Gazeta Shqiptare”, Oketa ka rrëfyer arsyet e rikthimit të tij në PD. Ai është shprehur se lëvizja e studentëve dhe protesta, i kanë rikthyer besimin se situata mund të ndryshojë.
“U riktheva në PD, për shkak të zhvillimeve politike. Lëvizja e studentëve dhe protesta më ktheu bësimin se mund të ndryshojë situata”, ka deklaruar ish-ministri i Mbrojtjes.
Më tej ai është pyetur edhe për atë që përflitet më shumë, se është një ndër kandidatët potentë të PD për Bashkinë e Durrësit në zgjedhjet e 30 qershorit. Ai ka thënë se pjesëmarrja e tij në politikë është për të dhënë kontributin, për ndërtimin e një sistemi politik demokratik.
“Unë jam në PD për më shumë se kaq. Unë jam në politikë për të kontribuar me aq sa mundem për ndërtimin e një sistemi politik vërtet demokratik. Nëse arrijmë të ndërtojmë një sistem të tillë, ju siguroj se gjithçka do të ishte më e lehtë për secilin prej nesh, pavarësisht bindjeve.
Nëse do ndërtojmë një sistem të tillë, Shqipëria do të ishte vërtet foleja e shqiptarëve. Unë nuk e shoh politikën thjesht çështje emri apo emrash. Ajo duhet të jetë e bazuar në një sistem vlerash, parimesh, idesh dhe progresesh”, përfundoi Oketa, duke lënë kështu të hapur mundësinë e kandidimit për të marrë drejtimin e Durrësit.
