Kërkimet shkencore të realizuara nga David Robert Grimes në “Queen’s University Belfast” kanë provuar se kanabisi, apo vaji i kanabisit nuk mund ta shërojnë kancerin.
Siç raporton “Daily Mail”, miti, sipas të cilit kanabisi shëron kancerin, është rritur edhe më tepër nga lëvizjet pro-legalizimit të bimës së drogës, të cilët abuzojnë duke reklamuar cilësitë shëruese të saj.
Por, sipas kërkuesit shkencor, David Grimes, e vërteta është vetëm një: “Kanabisi mund të lehtësojë dhimbjet te pacientët me kancer, por në asnjë rast nuk i shëron ata nga kanceri”. Pra, sipas tij nuk ka asnjë bazë për të pohuar se kanabisi shëron kancerin.
“Shumë njerëz pretendojnë se përdorimi i kanabisit apo vajit të tij zvogëlon tumoret e të tjera. Po kështu pretendohet se vaji i kanabisit i vret qelizat kanceroze në një epruvetë, por që të gjitha këta janë të pabaza”, thotë David Grimes. Sipas tij kanabisi nuk është në gjendje të vrasë në mënyrë selektive qelizat e kancerit në trupin e njeriut duke kursyer ato të shëndetshme.
Studimi i “Queen’s University Belfast” ka ardhur në këtë perfundim kategorik pasi ka studiuar disa mijëra raste të të sëmurëve që kanë provuar të përdorin kanabisin si zgjidhje për kancerin. TIRANA TODAY
