Serie A është duke u rikthyer si në kohët e arta. Këtë sezon shohim një dyndje të madhe ekipesh që janë në luftë për të mbajtur kreun. Ndryshe nga vitet e tjera kur Juventus merrte kreun dhe nuk konkurroheshe nga asnjë ekip, këtë vit shohim pesë ekipe që luftojnë për tu shpallur kampion, të paktën në 10 javët e para.
Napoli është ekipi më i kompletuar deri në këto momente në kampionatin italian, pasi nuk ka pësuar asnjë humbje dhe të vetmin barazim e ka marrë me Interin një javë më parë. Ata mbajnë vendin e parë me 28 pikë. Sarri ka krijuar një Napoli të fortë në të gjitha repartet dhe ka sulmin më të mirë në kampionat, mënyra si i ndërtojnë aksionet dhe sinkronizimi mes tyre e ka bërë Napolin që të jetë në vendin e parë me meritë të plotë.
Interi është surpriza e vitit deri në këto momente, por më shumë surprizë mund të quajmë Spalletin që po bën gjëra të mëdha edhe pse nuk iu plotësuan dëshirat në merkaton e verës. Zikaltërit janë në vendin e dytë me dy pikë më pak se kryesuesit, një ekip që ka luajtur pothuajse në çdo ndeshje me të njëjtin grup lojtarësh ka qëndruar i pamposhtur në 10javët e para. Ata shihen tashmë si pretendentë për titull edhe pse asnjë nga kampi zikaltër nuk e konfirmon këtë, ata kanë objektiv vetëm pjesëmarrjen në Champios që nëse do të vazhdojnë me këtë ritëm do ta kenë të sigurt. Nëse bosët kinezë të Interit do të kenë mundësinë të investojnë në merkaton e janarit, atëherë pretendimet e tyre mund të rriten për këtë sezon.
Juventusi, si një kampion në fuqi kaloi një fazë jo të mirë në kampionat, pasi u mposht nga Lacio dhe barazoi me Atalantë. Kjo bëri të mendohet që ekipi i drejtuar nga Allegri po kalon një krizë, që nuk ka zgjatur më shumë se dy javë. Bardhezinjtë mbajnë vendin e tretë me 25 pikë. Një garë të vështirë do të kenë juventinët këtë vit në kampionat edhe pse vazhdojnë të shihen si favoritënë Itali.
Lazio e Inzagit është një tjetër ekip që ka surprizuar këtë vit, të katërtit në tabelë me pikë të barabarta me Juventus. Lacialët kanë krijuar një grup kompakt që ka treguar një futboll të bukur këtë sezon dhe kanë shënuar shumë gola. Immobile është ai që po udhëheq ekipin duke shënuar pothuajse në çdo ndeshje, por edhe portieri shqiptarë Strakosha është ndër më të mirët në ekip dhe ka abonuar formacionin e më të mirëve në Serie A.
Roma nuk është në nivelin që prite edhe pse ka investuar shumë në merkaton e verës, trajneri i ri Di Francesco nuk e ka konsoliduar akoma 100% ekipin. Ata mbajnë vendin e pestë me 21 pikë dhe me një ndeshje më pak se ekipet e tjera, por ajo që ka dhënë në fushë ekipi roman nuk ka bindur që do të ketë një vazhdueshmëri të gjatë.
Milani është dështimi më i madh i këtij viti në Serie A, u investuan rreth 200 milion euro dhe u afruan mbi 10 lojtarë, të njohur në arenën ndërkombëtare. Montella nuk ka arritur akoma të bëjë lidhjen e duhur mes lojtarëve që të shprehin në fushën e lojës atë që kanë në këmbët e tyre. Milan mbanë vendin e tetë dhe presioni është shumë i madh si mbi trajnerin, ashtu edhe mbi lojtarët. Montella ka rrezikuar shumë shkarkimin në këto javë të para, pasi pas 10 ndeshjesh mbanë vendin e 8 me 16 pikë.
Benevento është ekipi që u ngjit këtë sezon në Serie A, ata nuk kanë arritur të shijojnë akoma se çdo të thotë të marrësh një pikë në kampionat. Pasi mbajnë vendin e fundit me zero pikë, në 10 ndeshje ata nuk kanë arritur të triumfojnë një herë dhe si po merr rrjedhën kampionati do ta kenë mjaft të vështirë ta bëjnë një gjë të tillë. Pjesë e Benventos janë edhe dy lojtarë të kombëtares shqiptare, Memushaj dhe Xhimshiti. (Tirana Today)
