Pas shkarkimit të Ancelottit nga pankina e Bayern Munich, pati dhe një krizë për kolumbianin James Rodriguez, i cili ishte transferuar në Gjermani vetëm për të vazhduar punën me trajnerin italian. Por tashmë duket se gjithçka ka kaluar dhe besimi që i ka dhënë tekniku i ri i bavarezëve Jup Heynckes lojtarit të Real Madrid (Rodriguez është huazuar deri në qershor të 2019-ës tek Bayerni me të drejtë blerje) e ka rilindur Jamesin. Së fundmi 26-vjeçari është shprehur se është mjaft i lumtur në Mynih dhe shpreson që të vazhdojë shumë gjatë në këtë ekip.
“Bayerni qëndron në të njëjtat nivele me Realin e Madridit. Objektivat e tyre janë gjithnjë maksimale, synojnë titujt e të gjitha kompeticioneve ku marrin pjesë. Te Bayerni janë mësuar me fitoret. Pa më të voglin dyshim, Bayerni është një ndër klubet më të mira europiane. Kam nisur një jetë të re në Gjermani, jam përshtatur mirë dhe ndihem shumë i lumtur në këtë ambient.
Diçka e dukshme në fakt, pasi James ka realizuar dy gola dhe ka dhuruar tre asist në 12 takimet e fundit të Bundesligës. “I duhej pak kohë që të përshtatej, por tashmë e ka shumë të qartë mentalitetin tonë dhe është unifikuar me këtë skuadër. Jo të gjithë e kuptojnë sa shumë impenjohet, koha do ta tregojë se gjithnjë e më shumë ai do të bëhet një element vendimtar në ecurinë e Bayenrit,” – deklaron trajneri Jupp Heynckes për fituesin e Këpucës së Artë të edicionit 2014. Bayerni ka në marrëveshje të drejtën e blerjes me 30 qershor të 2019-ës, kohë kur përfundon edhe huazimi i tij.
