7 Tetor 2001 – Shtetet e Bashkuara nisin pushtimin e Afganistanit
Një ditë pas paralajmërimit të fortë të presidentit amerikan, George Bush, ndaj regjimit taleban në Afganistan, orët e para të mëngjesit të 7 Tetorit 2001, nisin sulmet ushtarake kundër Afganistanit nga forcat e Shteteve të Bashkuara dhe një koalicioni ndërkombëtar që përfshinte Britaninë e Madhe, Kanadanë, Australinë, Gjermaninë dhe Francën.
Sulmi qe një hakmarrje ushtarake për sulmet e 11 Shtatorit 2001 nga Al-Kaeda në disa objektiva të SHBA-së, të cilat shkaktuan afro 3 mijë të vdekur. Operacioni i quajtur “Enduring Freedom-Afganistan”, erdhi pas disa javësh përpjekje diplomatike, për të bindur qeverinë talebane t’i dorëzonte autoriteteve amerikane udhëheqësin e Al-Kaedës, Osama bin Laden.
7 Tetor 1952 – Lind presidenti aktual rus Vladimir Putin
Vladimir Vladimirovich Putin, lindi në Leningrad, sot Shën Petersburgu. Nëna e tij, Maria, ishte një punëtore në një fabrikë, ndërsa babai i tij ishte detar në Marinën Sovjetike, ku shërbeu në flotën nëndetëseve në fillim të viteve 1930, dhe më vonë në vijën e parë të frontit në batalionin e shkatërrimit të NKVD (më vonë KGB-ja) gjatë Luftës së Dytë Botërore, ku dhe u plagos rëndë në vitin 1942.
Dy vëllezërit më të mëdhenj, Viktori dhe Alberti, lindën në mesin e viteve 1930; Albert vdiq brenda disa muajsh, ndërsa Viktori u prek nga difteria gjatë rrethimit të Leningradit në Luftën e Dytë Botërore. Gjyshi i Vladimir Putinit, Spiridon Ivanovich Putin (1879-1965), ishte kuzhinieri personal i Vladimir Leninit dhe bashkëshortes së tij, Nadezhda Krupskaya, dhe në disa raste gatoi edhe për Josif Stalinin.
Gjyshja e Putinit, u vra nga pushtuesit gjermanë në rajonin Tver në vitin 1941, ndërsa xhaxhallarët e nënës së tij u zhdukën në frontin e luftës. Duke ndjekur traditën e babait, Putin u bë shpejt pjesë e shërbimit sekret sovjetik, KGB. Vitet e e fundit të Luftës së Ftohtë ai mbante gradën e oficerit të KGB-së, dhe shërbente në Berlinin Lindor.
Putin u bë i njohur në skenën kombëtare dhe ndërkombëtare në vitin 1999, kur u zgjodh kryeministër nga presidenti i asaj kohe Boris Jelcin, ndërsa një vit më vonë zgjidhet kryetar i shtetit. Prej vitit 2000, ai ka kombinuar disa mandate si kryeministër dhe president, duke qenë de fakto udhëheqësi i vetëm dhe i gjithëpushtetshëm i federates ruse.
7 Tetor 1849 – Vdes shkrimtari i shquar amerikan Edgar Allan Poe
Poe u gjet më 3 tetor në rrugët e Baltimorës në një gjendje tepër të rëndë shëndetësore. Ai u dërgua në Spitalin e Kolegjit të Uashingtonit, ku vdiq të dielën e 7 Tetorit 1849, në orën 5 të mëngjesit. Poe nuk qe dhe aq i kthjellët për të shpjeguar gjendjen e tij të tmerrshme, dhe çuditërisht mbante veshur rroba që nuk ishin të tijat.
Thuhej se thërriste në mënyrë të përsëritur emrin “Reynolds” natën para vdekjes së tij, megjithëse mbeti e paqartë se kujt i referohej. Disa burime thonë se fjalët e fundit të Poe ishin:”Zoti ndihmoftë shpirtin tim të ngratë!”. Të gjitha të dhënat mjekësore, duke përfshirë edhe çertifikatën e tij të vdekjes, kanë humbur. Gazetat e kohës, raportuan se vdekja e Poe ishte shkaktuar nga një “inflamacion cerebral”, një eufemizëm i zakonshëm për vdekjen nga shkaqe të lidhura me alkoolizmin. Një bashkëkohës i Poes në atë kohë, theksoi:”Kjo vdekje ishte thuajse një vetëvrasje, një vetëvrasje e përgatitur prej një kohe të gjatë!”.
7 Tetor 1985 – Terroristët palestinezë rrëmbejnë një anije italiane
Katër terroristë palestinezë, rrëmbejnë anijen italiane “Achille Lauro”, sapo kjo e fundit la portin e Aleksandrisë në Egjipt. Burrat e armatosur, i përkisnin Frontit Popullor për Çlirimit të Palestinës, krahu terrorist i Organizatës për Çlirimin e Palestinës (OÇP), të udhëhequr nga Abu Abas. Në fillim, terroristët kërkuan që Izraeli të lirojë shokët e tyre të burgosur, dhe t’i lejonte hyrjen në një port sirian.
Por kur Siria e mohoi kërkesën, terroristët e humbën toruan, dhe zgjodhën rastësisht të vrisnin 69-vjeçarin Leon Klinghoffer. Amerikani i paralizuar në karrige me rrota, u qëllua për vdekje në kokë, dhe trupi i tij u hodh në det. Ky akt dëmtoi kauzën e terroristëve. Indinjata ndërkombërare e detyroi shefin e OÇP-së, Jaser Arafat të ndërpresë lidhjet me terroristët dhe t’i kërkojë Abas t’i japë fund pengmarrjes.
Elita e marinsave amerikanë, Navy Seal, u përgatit të ndërhynte, por kur këta të fundit mbërritën, terroristët kishin zbarkuar në Egjipt dhe më pas kishin marrë një avion për të shkuar në Libi. Dy avionë luftarakë amerikanë i lokalizuan, duke i detyruar të ulen në Itali. Abas dhe terroristët e tjerë u nxorrën në gjyq, dhe u dënuan në burg
7 Tetor 1571- Zhvillohet beteja e Lepantos
Beteja u zhvillua midis flotës së Lidhjes së Shenjtë, një koalicion i Spanjës (duke përfshirë territoret e saj të Napolit, Siçilisë dhe Sardenjës), Republikës së Venedikut, Papatit, Republikës së Gjenovës, Dukatit të Savojës dhe të tjerëve dhe flotën kryesore të ushtrisë osmane, me fitoren e të parëve. Beteja 5-orëshe, u zhvillua në skajin verior të Gjirit të Patras në Greqinë perëndimore. Kjo fitore i dha Lidhjes së Shenjtë një kontroll të përkohshëm mbi Deti Mesdheu, garantoi mbrojtjen e Romës nga pushtimi osman, dhe i pengoi osmanët të përparonin më tej në Evropë.
7 Tetor 1940 – Trupat gjermane hyjnë në Rumani. Adolf Hitleri vendosi të pushtojë Rumaninë, si pjesë e strategjisë së tij për krijimin e një fronti të pandërprerë lindor, për të kërcënuar Bashkimin Sovjetik. 7 Tetor 1943 – Japonezët ekzekutojnë gati 100 të burgosur amerikanë të luftës në Wake Island. Komandanti i garnizonit japonez në ishull, pretendoi se të burgosurit po përpiqeshin të lidheshin me radio me forcat amerikane.
7 Tetor 1870 – Ministri francez i Punëve të Brendshme, Leon Gambetta, arratiset nga Parisi i rrethuar nëpërmjet një balone, duke shkuar në selinë e qeverisë së përkohshme franceze në Tours.
7 Tetor 1944 – Shpërthen një kryengritje e të burgosurve në kampin nazist të përqëndrimit në Birkenau.
7 Tetor 1976 – Hua Guofeng, kryeministër i Republikës Popullore të Kinës, zëvendëson të ndjerin Mao Ce Dunt si kryetar i Partisë Komuniste të Kinës.
