25 Nëntor 1973 –Ushtria greke rrëzon qeverinë e juntës së kolonelëve, pas disa javësh trazira
Pati shumë pak rezistencë, kur tanket vërshuan rrugëve të Athinës, dhe kur trupat ushtarake morën pozicione përrreth ndërtesave qeveritare, që në orët e para të mëngjesit. Grushti i shtetit, u orkestrua nga shefi i frikshëm i policisë ushtarake, Demetrios Ioannidis. Ai ndodhi pas disa javësh trazirash në të gjithë vendin, dhe vetëm 8 ditë pas protestave të dhunshme studentore, ku gjetën vdekjen 13 persona dhe u plagosën qindra të tjerë.
Ish-presidenti i vetë-emëruar në atë detyrë pas grushtit të shtetit të kolonelëve të vitit 1967, George Papadopoulos, u vu nën arrest në vilën e tij në bregdet, vetëm 32 km larg kryeqytetit. Në gjashtë vitet e sundimit të tij, vendi përjetoi një shtypje dhe brutalitet të paparë. Ioannidis restauroi pjesërisht qeverisjen civile, por ruajti një masë të madhe të pushtetit.
Por rregjimi i tij zgjati vetëm disa muaj, duke u rrëzuar në vitin 1974, pas provokimit të një përpjekjeje të pasuksesshme të një grushti shteti në Qipro, çka çoi në pushtimin turk të ishullit. Ai u akuzua për tradhëti, dhe u dënua me burgim të përjetshëm. Ish kryeministri i mërguar, Konstantin Karamanlis, u ftua të rrikthehet për të kryesuar qeverinë e re.
Një referendum hodhi poshtë rivendosjen e monarkisë, dhe në vend të kësaj u themelua republika parlamentare. Karamanlis mbajti për 6 vjet postin e kryeministrit, dhe pastaj u zgjodh president. Atij i njihet merita e rrikthimit të vendit në demokraci, dhe anëtarësimin e Greqisë në Bashkësinë Ekonomike Evropiane më 1980-ën.
Pas rivendosjes së demokracisë, George Papadopoulos, u dënua më vdekje për tradhëti, ndërsa më vonë vendimi iu kthye në burgim të përjetshëm. Një vendim i qeverisë për ta liruar atë në në dhjetor të vitit 1990 për shkak të gjendjes së rënduar shëndetësore, u anulua pas një proteste të madhe publike. Ai i kaloi 3 vitet e fundit të dënimit të tij në një spital të burgut, para se të ndërronte jetë në qershor 1999.
25 Nëntor 1998 – Në Turqi, parlamenti voton pro rrëzimit të qeverisë së kryeministrit Mesut Yilmaz
Qeveria turke u rrëzua pas humbjes së një mocioni mosbesimi, për shkak të akuzave të shumta për korrupsion. Asambleja turke votoi me shumicë absolute – 314 vota pro dhe 214 kundër – në favor të një mocioni të opozitës për mosbesim ndaj qeverisë së koalicionit të kryeministrit Mesut Yilmaz.
Yilmaz akuzohej për mashtrim në privatizimin e një banke shtetërore në shumën 600 milionë dollarë, si dhe për lidhje me mafian turke. Ai i hodhi poshtë këto akuza, duke pretenduar se po rrëzohej nga pushteti pikërisht nga mafia, ndërsa paralajmëroi se ekonomia por dhe politika e jashtme e vendit, do të vuanin pasojat e këtij akti. Yilmaz u ngjit në pushtet rreth 17 muaj më parë, pasi qeveria e parë pro-islamike e Turqisë u detyrua të largohej nga pushteti nga ushtria.
25 Nëntor 1844 – Lind Karl Friedrich Benz, arkitekti i motorit me djeshme të brendshme
Karl Friedrich Benz lindi në Karlsruhe të Gjermanisë. Ai ishte një inxhinier motorësh dhe automobilash, i cilësuar përgjithësisht si shpikësi i automjetit me benzinë dhe themelues i automjetit të famshmëm, Mercedes-Benz. Bashkëkohësit e tjerë gjermanë, Gottlieb Daimler dhe Wilhelm Maybach bashkëpunuan me të, ndërsa pa dijeninë e njëri-tjetrit punonin mbi lloje të ngjashme shpikjesh, por ishte pikërisht Benz ai që mori patentën për punën e tij të pare, dhe pas kësaj, patentoi të gjitha proceset që bënë të mundur përdorimin e morotëve me djegie të brendshme tek automobilat.
25 Nëntor 885 – Trupat Vikinge lundrojnë në lumin Senë me një flotë prej 300 anijesh të vogla të shpejta, duke rrethuar Parisin.
25 Nëntor 1343 – Një cunami, i shkaktuar nga një tërmet i fortë në Detin Tirren, shkatërron Napolin dhe Republikën Detare të Amalfit.
25 Nëntor 1491 – Traktati i Granadës, i jep fund rrethimit të qytetit, që ishte fortesa e fundit e maorëve në Spanjë.
25 Nëntor 1667 – Një tërmet vdekjeprurës trondit rajonin Shemakha në Kaukaz, duke vrarë mbi 80.000 njerëz.
25 Nëntor 1759 – Një tërmet i fortë godet rajonin e Mesdheut, duke rrënuar Beirutin dhe Damaskun, dhe duke vrarë 30-40 mijë njerëz.
25 Nëntor 1839 – Një ciklon i madh godet Indinë, duke shkatërruar plotësisht qytetin port të Koringas, që nuk arrit të rindërtohej kurrë plotësisht. Stuhia shkaktoi futjen e detit në brendësi të tokës, duke marrë me vete 20.000 anije dhe mijëra njerëz. Dëshmitë e kohës flasin, për mbi 300 mijë të vdekur nga kjo.katastrofë natyrore.
25 Nëntor 1915 – Albert Einstein, prezanton në Akademinë Prusiane të Shkencave, ekuacionet që lidhen me teorinë e relativitetit.
25 Nëntor 1918 – Vojvodina, dikur territor i perandorisë Austro-Hungareze, shpall shkëputjen e saj për t’iu bashkuar Mbretërisë Serbe.
25 Nëntor 1936 – Në Berlin, Gjermania dhe Japonia nënshkruan Paktin Anti-Komintern, duke rënë dakord të konsultohen për masat që do të ndërmarrin “në mbrojtje të interesave të tyre të përbashkëta”, në rastin e një sulmi të papritur nga ana e Bashkimit Sovjetik.
25 Nëntor 1963 – Nëpërmjet një ceremonie shtetërore, presidenti amerikan John Kennedy, i vrarë 3 dië më parë në Dallas, varroset në varrezat e Uashingtonit.
25 Nëntor 1977 – Ish-senatori filipinas Benigno Aquino, shpallet fajtor nga Komisioni Ushtarak dhe dënohet me vdekje. Ai arratiset nga vendit, por do të vritet në vitin 1983, sapo u rrikthye në Manila.
25 Nëntor 1992 – Asambleja Federale e Çekosllovakisë, voton pro ndarjes së vendit në Republikën Çeke dhe Sllovaki. Vendimi hyri në fuqi më 1 janar 1993.
Përshtati për Tirana Today, Alket Goce
