Imami i njohur, Ahmed Kalaja deklaroi sot se besimtarët ditën e 25 qershorit kanë të drejtën e tyre për të festuar Bajramin e Madh dhe njëherësh t’i drejtohen kutive të votimit.
Përmes një postimi në Facebook, Kalaja vë në dukje se data 25 qershor përkon me festën fetare të myslimanëve për të mos bërë ndryshime në këtë mënyrë nuk cenohet Kushtetuta. Kjo lidhet me faktin, se nëse zgjedhjet do të caktoheshin në një datat, që ishin përmendur më parë si 16 korriku, 23 korriku, 3 shtatori dhe 9 shtatori, do të duhej të ndërhyhej në Kushtetutë, gjë e cila do të shoqërohej edhe me një krizë të stërzgjatur politike.
“Si individ, dua të sqarojë së respektimi i Ligjit Themelor të këtij vendi, Kushtetutës, prej besimtarëve myslimanë është një prioritet që nuk duhet anashkaluar prej askujt që e do vendin e tij. Gjithashtu, mendoj dhe besoj se ndryshimi i datës së zgjedhjeve nuk është një obligim i hoxhallarëve, por i ligjvënësve, e për këtë arsye, them dhe besoj se dita e përcaktuar për zgjedhjet është diçka që tejkalon mundësitë dhe kapacitetin tonë për të sugjeruar një ndryshim pasi ai është vendosur dhe caktuar në Ligjin Themelor. Besimtarët myslimanë si pjesë e kësaj shoqërie duhet të shprehen me votë, nëse duan, e të zgjedhin përfaqësuesit që ata mendojnë se do t’i çojnë drejt prosperitetit material”, shkruan Kalaja.
Çfarë thotë Kodi Zgjedhor për caktimin e datës së Zgjedhjeve ?
Postimi i plotë i imam Ahmed Kalasë:
Sqarim për Opinionin Publik.
Për Bajram do festojmë e nuk është haram të votojmë.
Më emrin e Allahut shumë të Mëshirshëm, Mëshirues
Për Bajram do festojmë e nuk është haram të votojmë, më bëri habi nuk më tingëlloi mirë, mirëpo situata në këndvështrim Kushtetues edhe ligjor e përcaktonte shprehimisht; “një nga dy të dielat e fundit” shoh që nuk lënë hapësirë manovrimi në favor të mos përplasjes ashtu siç jam shprehur në dy deklarimet e djeshme.
Pikërisht për këtë sqaroj më tej se; Arritja e një konsensusi apo marrëveshje politikë, na tregon të gjithëve se ATDHEU është i yni e për të ardhmen tonë duhet të kontribuojmë të tërë.
Si individ, dua të sqarojë së respektimi i Ligjit Themelor të këtij vendi, Kushtetutës, prej besimtarëve myslimanë është një prioritet që nuk duhet anashkaluar prej askujt që e do vendin e tij.
Gjithashtu, mendoj dhe besoj se ndryshimi i datës së zgjedhjeve nuk është një obligim i hoxhallarëve, por i ligjvënësve, e për këtë arsye, them dhe besoj se dita e përcaktuar për zgjedhjet është diçka që tejkalon mundësitë dhe kapacitetin tonë për të sugjeruar një ndryshim pasi ai është vendosur dhe caktuar në Ligjin Themelor. Besimtarët myslimanë si pjesë e kësaj shoqërie duhet të shprehen me votë, nëse duan, e të zgjedhin përfaqësuesit që ata mendojnë se do t’i çojnë drejt prosperitetit material.
Ndërsa unë si hoxhë e teolog, do kisha dashur që dita e Bajramit të ishte festë kombëtare e të përjetohej prej të tërëve ashtu siç ka qenë kaherë.
Sido të jetë, përkrah bindshëm ligjet e vendit tim dhe besoj që ligjvënësit e atdheut tim kanë marrë vendimin e duhur, pavarësisht koincidencës, që dita e zgjedhjeve bie për ditë Bajrami.
Kjo do na japë mundësinë në teologëve, ashtu si dhe KMSH që të përcjellim mesazhe paqeje, sensibiliteti e qetësie atë ditë kur do të përcaktohen “fatet” e këtij vendi.
E sigurt që në myslimanët do festojmë për Bajram, do bëjmë festë të madhe, do lutemi për udhëheqësit e vendit tonë që Zoti t’i udhëzojë në punë të mira, larg korrupsionit dhe në përmirësimin e gjendjes së popullit tonë.
Për Bajram do festojmë, do votojmë, do urojmë garuesit në votim, që të fitojë ai që i sjell vendit zhvillim e begati Shqipërisë tonë.
