Kalaja e Rozafës, një nga pikat kryesore turistike në Shkodër që tërhiqte një numër të konsiderueshëm vizitorësh, këtë vit është vizituar vetëm nga 20% e numrit të vizitorëve që e vizitonin normalisht.
Kurrë më parë rrugicat dhe sheshet e Kalasë së Rozafës nuk kanë qenë kaq të boshatisura.
Mungojnë jo vetëm grupet e turistëve, por edhe ekskursionet e organizuara nga shkolla të ndryshme nga i gjithë vendi.
Izolimi i plotë nga pandemia, si dhe masat dhe frika e tanishme nga infektimi me Covid-19, ka bërë që ky monument historie dhe kulture të mos përjetojë interesin që meriton.
Këto ditë numri i vizitorëve rritet kryesisht ditëve të diela kur hyrja në kala është falas dhe natyrisht që mes vizitorëve dominojnë ato nga Kosova, shkruan “A2”.
Por nuk mungojnë as vizitorët e huaj, të cilët pavarësisht shifrave në rritje të të infektuarve në vendin tonë, nuk janë stepur të vizitojnë Shqipërinë.
