Sezoni që lamë pas ishte i errët për Ergys Kaçen, i cili u aktivizua shumë pak. Por duket se ajo periudhë krize për mesfushorin e kombëtares shqiptare është hedhur pas krahëve. Ai ka qenë titullar në ndeshjen e fundit të Panathinaikosit dhe e luajti të gjithë takimin.
Ndërsa për ndeshjen me Lavadikosin fillimisht u raportua se Kaçe ishte i dëmtuar dhe nuk do të aktivizohej. Por duket se nuk ka asgjë të vërtetë dhe ai do të aktivizohet që nga minuta e parë. Ndërkohë ai ka dhënë edhe një intervistë së fundmi për mediat greke teksa shprehet:
“Nuk dua të flas shumë për veten time. E rëndësishme është që ne kemi luajtur mirë në takimin e fundit. Kemi luajtur në një fushë të keqe dhe ishim të gjithë në nivelin e duhur. Unë jam shumë i lumtur që morëm tre pikët në transfertën e shkuar. Unë e besoj titullin kampion me Panathinaikos. Kam qenë edhe në sezonin e shkuar këtu, e di që ka lojtarë të mirë. Kemi edhe një trajner të mirë gjithashtu.
Kemi ndryshime në skuadër dhe jemi shumë të mirë, edhe në lojtarët e pankinës. Kjo falë punës së trajnerit. Njerëzit duan të shohin një skuadër të mirë dhe ata besoj se e shohin se ne po japim gjithçka. Unë mendoj se Panathinaikosi pa tifozët e tij, e humbet kuptimin. Në një moment të vështirë, tifozët duhet të na japin përkrahje me mesazhet e tyre dhe së bashku, si një familje e madhe, duhet të ecim përpara”.
