Kombëtarja shqiptare vazhdon stërvitjen nën urdhrat e Christian Panuccit për ndeshjen e 26 marsit me Norvegjinë. Tekniku italian në stërvitjen e fundit ka hedhur bazat e formacionit që pritet të jetë startues në këtë sfidë, ku pritet të ketë disa risi në 11-tëshen startuese.
Nga ajo çfarë është parë në stërvitje dhe mentalitetin e një futbolli të bukur e sulmues që ka Panucci, pritet që të shohim një formacion 4-3-3. Në portë pritet që të jetë Thomas Strakosha, pasi Berisha edhe në ndeshjesh përgatitore nuk ka qenë pjesë e formacioneve, pasi nuk është rikuperuar plotësisht nga dëmtimi.
Panucci organizoi në stërvitjen e fundit një ndeshje përgatitore, të parët u rreshtuan në formacionin 4-3-3, të cilët konsiderohen si titullarët, ndërsa ekipi tjetër është rreshtuar 4-2-3-1 si ekip rezervist.
Vija e mbrojtjes që do të rreshtohet para Strakoshës pritet të jetë e njëjta që kemi parë në ndeshjen e fundit. Në qendër do të jetë dyshja Mavraj-Gjimshiti, ndërsa nga krahët Hysaj dhe Lenjani. Në mesfushë pritet të debutojë një risi, Ylber Ramadani i mbështetur nga Xhaka dhe Qaka.
Trajneri në këtë sfidë më shumë vëmendje tregoi pikërisht tek mesfusha, e cila do të bëjë lidhjen e mbrojtjes me sulmin. U pa një impenjim shumë i madh në këtë pikë sa Panucci u fut disa herë në fushë për tu treguar lojtarëve lëvizjet që duhet të bënin në situata të ndryshme.
Edhe sulmi do të ketë një emër të ri, Bekim Balaj pritet të jetë titullarë në këtë ndeshje miqësore, i ndihmuar nga krahët nga Grezda dhe Roshi. Bie në sy mungesa e Sadikut, që ka qenë një titullarë i padiskutueshëm, por minutat e pakta tek Levante dhe lëndimi që sapo la pas kanë detyruar Panuccin që ta seleksionojë tek rezervat.
Por Sadiku nuk hoqi dorë nga fanella e titullarit, dha maksimumin në këtë sfidë duke shënuar një gol për skuadrën e dytë dhe një tjetër iu anulua për pozicion jashtë loje. Pjesa e dytë solli shumë ndryshime për të dyja ekipet, ai hodhi në ekipin e parë Alijin në vend të Lenjanit, Likan për Hysajn, Lilajn për Ramadanin dhe Ajetin që i zuri vendin Gjimshtit.
Ndërsa më pas u bashkua edhe Sadiku që sërish la gjurmë, pasi shënoi gol edhe për ekipin e parë. Sfida u mbyll në barazim 2-2, me Sadikun që shënoi një gol për çdo skuadër, ndërsa për ekipin e rezervave shënoi gjithashtu dhe Gavazaj e për titullarët Roshi. Gjithsesi, alternativat e para me shumë mundësi janë për momentin më të avantazhuar për të patur një vend titullari dhe pse deri të hënën shumë gjëra mund të ndryshojnë.
