Presidenti i Republikës së Shqipërisë, Ilir Meta ka shfrytëzuar vizitën në Francë për të nderuar me çmimin “Mjeshtër i Madh” ish-futbollistin e kombëtares, Edvin Muratin. Mesfushori ka luajtur me kuqezinjtë 42 ndeshje dhe ka gjetur katër herë rrugën e rrjetës.
Murati në karrierën e tij ka luajtur edhe për shumë skuadra të tjera, ku ndër to janë edhe gjigantët francezë të Paris Saint Germain.
“Sot, në qytetin e klubit të famshëm të futbollit Paris-Saint-Germain, pata kënaqësinë e veçantë t’i akordoja yllit të futbollit tonë, Edvin Murati titullin: “Mjeshtër i Madh”. Së bashku me vlerësimin për kontributin e tij në promovimin e Shqipërisë në Francë, një urim të veçantë për të me rastin e ditëlindjes dhe për familjen e tij të dashur, këtë investim të bukur në marrëdhëniet mes vendeve dhe popujve tanë,–shkruan Meta në faqen e tij zyrtare në “Facebook”.
