Juventusi ka arritur të marrë një fitore spektakolare, 2-4 në transfertën ndaj Genoas, e cili nuk filloi aspak mirë për bardhezinjtë. Genoa kaloi në avantazh që në sekondat e para të sfidës, ku Miralem Pjaniç shënoi një autogol në portën e Buffon.
Vetëm gjashtë minuta më pas, vendasit dyfishuan rezultatin me anë të një 11 metërshi të diskutueshëm, të kthyer në gol nga Galabinov.
2-0 për Genoan dhe u duk se do të ishte një mbrëmje e vështirë për bardhezinjtë, por djemtë e Allegrit morën lojën nën kontroll dhe arritën të barazojnë rezultatin brenda 45 minutave të para.
Paolo Dybala shënoi dy herë, fillimisht pas asistit të Pjaniç dhe më pas me 11 metërsh, duke mbyllur pjesën e parë në barazim.
Juan Cuadrado ishte autori i golit të tretë për Juventusin, në minutën e 62-të, ndërsa Dybala shënoi një tjetër gol të mrekullueshëm, në minutën e parë shtesë, duke vulosur rezultatin dhe tripletën personale, shkruan Top Channel.
Takimi tjetër i Serisë A, midis Beneventos dhe Bolognas, përfundoi me fitoren e miqve, 0-1. Për Beneventon aktivizohet edhe mbrojtësi i kombëtares shqiptare, Berat Gjimshiti, i cili ndoqi takimin nga pankina.
