Juventus në “ankth”, Dybala viziton Madridin

Serie A është ndërpresë për shkak të angazhimeve që lojtarët do të kenë me kombëtaret respektive. Paolo Dybala, duke qenë se nuk është grumbulluar nga Sampaoli tek Argjentina, ka vendosur që të vizitojë Madridin. Ai ndodhet në kryeqytetin spanjoll bashkë me vëllain e tij menaxher dhe një mikun e tij. Vizita nuk ka kaluar pa u ndjerë, teksa zërat flasin për një takim sekret me drejtuesit e Realit, për të diskutuar mbi një transferim të mundshëm në kryeqytetin spanjoll, në sezonin e ardhshëm.

Reali verën e ardhshme do të investojë në repartin e sulmit, duke parë që treshja BBC nuk po jep më produktivitetin e duhur dhe Bale nuk është më në planet e madrilenëve. Dybala ka qenë një ndër të preferuarit e Perezit, por edhe të Ronaldos. Ky i fundit mësohet se i ka shprehur dëshirën presidencës për të nënshkruar me një lojtarë krahu dhe jo sulmues, pasi preferon që sezonin e ardhshëm të jetë ai qendra. Në atë listë bëjnë pjesë Dybala, Hazard dhe Guedes i Valencias.

Ky lajm ka bërë që në ambientin bardhezi të shqetësohen, pasi Dybala shikohet si një idhull, një futbollist që ‘ndez’ fantazinë e tifozërisë me golat dhe veprimet e bukura sportive në fushën e lojës.