Dita e shtunë do të shpallet ditë zije për tragjedinë e Genoas, e cila u mori jetën 38 njerëzve për shkak të shembjes së urës Morandi. Kjo pritet të ndikojë edhe në kampionatin italian i cili do të fillojë këtë fundjavë. Dy skuadrat e Genoas kanë vendosur që të mos zbresin në fushë dhe këtë shembull pritet ta ndjekin edhe ekipet e tjera italiane.
Ishte presidenti i Sampdorias që konfirmoi lajmin në një intervistë për radio “RMC”: “Sampdoria dhe Fiorentina kanë rënë dakord të mos luajnë. As Genoa nuk do të luajë dhe si rrjedhojë edhe Milan do të pushojë. Kam folur edhe me Marotta, edhe ai ka firmosur që Juventus mos të luajë të shtunën, kur në Genoa do të jetë në zi i gjithë qyteti. Ata mbështesin vendimin tim dhe solidarizohen me qytetin tonë,” – deklaroi Ferrero.
Fjalët e tij i kanë vërtetuar me komunikata për shtyp edhe Fiorentina dhe Genoa. Sonte në mbrëmje do të merret vendimi përfundimtar nga drejtuesit e Serie A.
