Juventusi ka arritur të kualifikohet në çerekfinalet e Champions League, pas një ndeshje dramatike të zhvilluar në “Wembley”, pasi ka mposhtur Tottenham 1-2. Edhe pse vendasit ishin të parët që shënuan dhe Juventus luajti gjatë gjithë kohës e tërhequr mbrapa, iu deshën vetëm dy goditje në portë për të siguruar kualifikimin.
Ishte Tottenham që filloi më mirë ndeshjen duke rrezikuar disa herë në minutat e para me Son dhe Kane. Por Juventus mund të kishte rastin më të mirë për të shënuar nëse arbitri do të kishte akorduar një penallti në favor të Douglas Costa i cili pengohet qartë në zonë nga Vertonghen. Juventus mbrohet mirë por arrin të dalë përpara për të krijuar mundësi goli.
Ndërsa Tottenham prodhon shumë por tregohet i pasaktë. Por në minutën e 39’ ishte Son ai që zhbllokoi rezultatin me një gol me shumë fat pas krosit të Kieran Trippier. Pas pushimit nuk ndryshon asgjë. Tottenham vazhdon të dominojë ndeshjen duke shtyrë përpara për të gjetur dyfishimin e rezultatit. Por Juventus zgjohet papritmas dhe arrin të shënojë dy gola brenda 2 minutave dhe 48 sekondave. Pikërisht me dy goditjet e para dhe të vetme drejt portës.
Në fillim ishte Higuain ai që barazoi rezultatin pasi shtyu në rrjetë topin e goditur me kokë nga Khedira, ndërsa El Pipita përgatiti golin e dytë të shënuar me lehtësi nga Dybala. Kjo ishte goditja e tij e 28-të drejt portës në Champions, dhe goli i parë për këtë sezon. Tottenham hidhet në sulm ndërsa Juve zhytet thellë në mbrojtje duke krijuar një barrierë e cila duket e padepërtueshme.
Manchester City kalon në fazën çerekfinale të Champions Leaguem, pavarësisht se u mposht nga Basel në “Etihad”. Djemtë e Guardiolës triumfojnë me rezultat të përgjithshëm 5-2, pasi në Zvicës kishin fituar me rezultatin 4-0.
Manchester City shënoi i pari pas tetë minutash lojë me anë të Gabriel Jesus, pas pasimit të Bernardo Silva. Ky ishte goli i parë për brazilianin në 13 ndeshjet e fundit. Për herë të fundi ai kishte tundur rrjetën në muajin nëntor.
Gjithsesi, kur u mbush çerekore lojë Mohamed Elyounoussi vuri baraspeshën për miqtë nga Zvicra. Në pjesën e dytë, Basel u largua me kokën lart nga ky edicion i Champions League duke gjetur edhe golin e fitores me anë të Michael Lang.
