Teksa vijon ngujimi në Fakultetin e Juridikut nga një grup studentësh, pjesa tjetër kanë vendosur që të vijojnë procesin mësimor i cili nis në gjimnazin “Petro Nini Luarasi”, në orën 14:00.
Zgjidhja u ndërmor nga dekani i fakultetit, Artan Hoxha, ndërsa ambientet e fakultetit Juridik vazhdojnë të jenë të zëna nga një grup studentësh që kanë zgjedhur këtë formë ngujimi për plotësimin e kërkesave të tyre.
Një nga studentët e ngujuar ka akuzuar se ata po marrin kërcënime që të braktisin ngujimin.
“Është fakt i vërtetuar se ne kërcënohemi në rrjetet sociale, por edhe me numra. Na akuzohen edhe familjet. Në orët e vona të natës na kërcënojnë në telefon, na thonë dilni nga ngujimi. Të vazhdosh mësimin tek Petro Nini nuk është zgjidhje, por mos zgjidhje. Gjimnazi nuk i ka kurrë kapacitetet e duhura, kësaj i thonë t’i shmangesh përgjegjësive”,- tha studenti për News 24.
“Ne do presim edhe qëndrimin e pedagogëve deri më 1 shkurt, pastaj do marrim masat tona”,– shtoi ai.
