Pas këmbënguljes disa mujore të klubit të Kamzës, sulmuesi Sebino Plaku ka zgjidhur më në fund kontratën me Skënderbeun dhe i është bashkuar skuadrës së Ndreut në stërvitje. 32-vjeçari konsiderohet “qershia mbi tortë” në këtë merkato dhe klubi pritet t’i besojë edhe shiritin e kapitenit.
Plaku është shprehur i lumtur për aventurën e re si dhe nuk ka ngurruar të falenderojë presidentin e Skënderbeut për prishjen me mirëkuptim të kontratës, pasi ajo i skadonte në janar.
“Gjithccka u mbyll me mirkuptim mes palëve për zgjidhjen e kontratës sime. Falenderoj Presidentin Ardjan Takaj që u tregua shumë i sjellshëm me mua dhe arritëm akordin. Sot në mesditë firmosa për Kamzën dhe do të jetë ai ekipi im i ri.” – ishin fjalët e Plakut për gazetën Shekulli.
Nga ana tjetër trajneri Ilir Daja i pyetur për çështjen Plaku dhe për mungesën e tij në stërvitje theksoi shkurtimisht pas ndeshjes me Mamurrasin.
“Mesa di unë plaku ka mbaruar kontratën me Skënderbeun dhe nuk i është rinovuar për faktin se Soue dhe Nespor luajnë në të njëjtin pozicion. Dhe kjo ka qenë një zgjedhje e klubit.”- bëri me dije Ilir Daja.
