Presidenti i Turqisë, Recep Tayyip Erdogan, nuk ka ndërmend që të tërhiqet në qëndrimin e tij ndaj Greqisë, pavarësisht ndërhyrjes së ndërkombëtarëve.
Ai vijon me deklaratat provokuese. I pranishëm në ceremoninë e diplomimit të ushtarakëve të rinj, Erdogan është shprehur se Turqia është gati të sfidojë armiqtë në çdo terren, në tokë, ajër dhe në det.
“A e pranojnë grekët atë që do t’u ndodhë atyre, për shkak të udhëheqësve të tyre të paaftë dhe ambiciozë? Ne i sfidojmë armiqtë tanë në tokë, det dhe në ajër”, ka thënë ai.
Erdogan ka përmendur edhe Francën, një nga shtetet më aleate të Greqisë. Recep Tayyip Erdoğan është shprehur se pasojat do i vuajë populli francez, për shkak të udhëheqësve, ku sipas tij, janë të paaftë.
“A e di qytetari francez që do të paguajë për shkak të udhëheqësve të tij të paaftë dhe ambiciozë? Janë shtuar kërcënimet kundër të drejtave dhe interesave tona në rajonin e Mesdheut dhe Egjeut.
Unë besoj se me ndihmën e Zotit, nuk do të ketë asnjë pengesë në hapat e Turqisë. Pyetja është: A janë gati të bëjnë të njëjtat sakrifica ata që qëndrojnë përpara nesh në Mesdhe?
Ata e kanë parë vendosmërinë tonë, kur bëhet fjalë për mbrojtjen e të drejtave tona? Si në tavolinë, ashtu edhe në terren. Në tërë historinë e saj, Turqia nuk ka qenë kurrë një shtet agresiv, është një nga vendet e rralla si shtet jo-kolonial. Turqia nuk ka qenë kurrë një vend që sulmonte vendet e tjera”, ka thënë ndër të tjera presidenti Erdogan.
