Ministri i Jashtëm i Serbisë, Ivica Daçiç në Samitin e Ministrave të Jashtëm të BE-së dhe vendeve të Ballkanit që u zhvillua në Bukuresht në kuadër të presidencës rumune të Këshillit të Ministrave të BE-së, ka replikuar me Gent Cakajn.
Ministri i Jashtëm i Serbisë Ivica Daçiç, që në fillim të takimit ka shigjetuar zv.ministrin shqiptar që vjen nga Kosova. Meqenëse në takim përveç tij ishte dhe Ministri i Jashtëm i Kosovës Behxhet Pacolli, Daçiç ka kërkuar shkas për ta parë këtë si provokim duke e nisur takimin me shigjetime, se pse Kosova kishte dy ministra të Jashtëm.
Nisur nga fakti që Daçiç është nga Prizreni, ministri Cakaj i ka kujtuar se duhej të ishte skandalizuar më herët. “Në fakt zoti ministër ju duhet të ishit skandalizuar më parë, sepse Kosova i ka pasur dy, dhe ka një fjalë që thotë nuk ka dy pa tre! Ju jeni nga Prizreni apo jo, por përfaqësoni këtu Serbinë, ndërsa unë po jam shqiptar nga Kosova dhe përfaqësoj Shqipërinë!”, i tha Cakaj-Daçiç.
Daçiç ka lindur më 1 janar 1966 në Prizren dhe babai i tij asokohe ishte polic. Kur ishte 6 muajsh familja e tij është shpërngulur nga Prizreni për tu vendosur në Žitorađa. Një foto e politikanit më të njohur serb është publikuar në media, ku ai shihet me një pistoletë në dorë, e cila mendohet t’i përkiste të atit, një ish-efektiv policie.
Gjatë kohës kur ishte kryeministër i Serbisë, Ivica Daçiç, ka shprehur disa herë dëshirën për të votuar në Kosovë në zgjedhjet lokale, për shkak se ka lindur në Prizren. Por Komisioni Qëndror i Zgjedhjeve thotë se pavarësisht se ai e ka origjinën nga Kosova, duhet të plotësojë disa kushte për të votuar. Kështu, Daçiç duhet të jetë i regjistruar në listën qendrore civile të Kosovës. Përndryshe ai nuk mund të votojë, madje as bazuar mbi ligjet e Serbisë. Për më tepër, juristët serbë thonë se ai nuk mund të votojë në një vend ku nuk banon.
