Joshua jep lajmin e madh: Brenda vitit zhvillohet supermeçi

Meçi më i madh i kohëve të fundit Joshua-Wilder pritet që të zhvillohet brenda këtij viti. Do të jetë një përballje titanësh për të arritur unifikimin e titujve kampion bote të peshave të rënda mes britanikut dhe amerikanit.  Dy boksierët kampionë kanë kohë që kanë nisur bisedimet për këtë sfidë të madhe, por ende nuk kanë arritur një marrëveshje. “Me 95% kjo përballje do të zhvillohet këtë vit, jam i bindur për këtë”, tha Joshua, që mban titujt e kategorive IBF, WBA dhe WBO, ndërsa Wilder mban titullin e kategorisë WBC.“Unë jam shumë i interesuar që kjo sfidë të zhvillohet këtë vit. Mjaft u morëm me bisedime për marrëveshjen financiare, ndaj le t’i lëmë gjërat mënjanë dhe të arrijmë marrëveshjen. Por Wilder nuk mund të më vendosë kushte, pasi unë nuk kam ardhur për të shitur titujt kampionë. Le ta ndërtojmë këtë sfidë mbi baza reale. Unë dua që kjo përballje fillimisht të zhvillohet në Britaninë e Madhe dhe më pas në Amerikë. Kjo sfidë mund të zhvillohet këtë vit”, u shpreh Anthony Joshua.