Më 22 shtator në “Wembley” do të zbresë britaniku Anthony Joshua për të mbrojtur titujt kampion bote ku përballë do të ketë rusin Alexander Povetkin. Edhe pse Joshua është shpallur favorit në këtë duel ai është i frikësuar pasi kundërshtari ka shumë eksperiencë dhe është 10 vite më i madh.
“Është një sfidë e vështirë, pasi përballë është një rival më përvojë dhe i fortë. Por jam përgatitur mirë edhe pse e ndjej presionin e një dueli të tillë, para 90 mijë tifozëve. Nuk e mohoj që fitorja është objektivi i vetëm, por hera-herës mendoj për humbjen e parë dhe i trembem këtij fakti”, tha 28-vjeçari Joshua, 10 vjet më i ri se rivali rus (Povetkin ka 34 fitore e vetëm 1 humbje si profesionist).
“Jam i relaksuar edhe pse jam përgatitur fort, duke ruajtur energjitë për këtë duel. Mezi po e pres këtë sfidë për të shkarkuar të gjithë këtë tension te rivali im, përmes grushteve të mia. Kjo përballje do të jetë si një lojë shahu me Povetkin, pasi ai pret lëvizjen time i pari dhe nuk i dihet se si është kundërpërgjigjja. Kjo është një sfidë që luhet me mendje dhe zemër”, u shpreh Joshua.
Britaniku i ka fituar të 21 përballjet e deritanishme si profesionist, nuk ka asnjë humbje por shifra 0 e tremb shumë Joshua, që do të duelojë para 90 mijë fansave për të mbrojtur titujt e kategorive IBF, WBO dhe WBA.
