Ish-kreu i diplomacisë britanike, Boris Johnson u shpreh sot në Parlament se nuk është tepër vonë për të shpëtuar Brexit, dhjetë ditë pas dorëheqjes së tij nga qeveria për mosmarrëveshje në lidhje me strategjinë e Theresa May.
Ai kritikoi kryeministren konservatore se ka devijuar drejt një ‘’Brexit që vetëm emrin ka si të tillë’’ dhe i kërkoi të ndryshojë taktikë, në një deklaratë të shkurtër që synon edhe një herë për të vënë në pikëpyetje autoritetin e saj, në një moment kur May po negocion largimin e vendit nga Bashkimi Europian, planifikuar më 29 mars të vitit 2019.
‘’Kemi ende kohë në këto negociata’’, pohoi ai, duke mbështetur tezën e një shkëputje të pastër me BE-në, ndërsa kryeministrja po orientohet drejt një Brexit ‘’të butë’’, me synim ruajtjen e lidhjeve të ngushta me BE-në.
Boris Johnson i bëri thirrje May që të ripajtohet me vizionin e Brexit të paraqitur prej saj në janarin e 2017 në fjalimin e mbajtur në Lancaster House dhe që pasqyronte një Britani të Madhe ‘’ të fortë dhe të pavarur’’.
