Vettingut duket se nuk do i shpëtojnë as oficerët e policisë gjyqësore, të njohur ndryshe si “hetues”.
Drafti parashikon që oficerët e policisë gjyqësore të të gjitha seksioneve të verifikohen për pastërtinë e figurës brenda një viti nga hyrja në fuqi e ligjit.
Pika 3 e nenit 40 të draftit thekson se autoriteti që do të verifikojë oficerët e policisë gjyqësore është Sektori për Verifikimin e Integritetit në Prokurorinë e Përgjithshme.
Ndërkohë, oficerët që kalojnë filtrin e pastërtisë së figurës do të vijojnë detyrën. Ndërkaq, oficerët e seksionit të policisë gjyqësore në Prokurorinë për Krime të Rënda, mbeten në detyrë deri në krijimin e Byrosë Kombëtare të Hetimit. Pas krijimit të Byrosë Kombëtare të Hetimit, Komisioni i Policisë Gjyqësore bën shpërndarjen e tyre në prokuroritë e juridiksionit të përgjithshëm.
