Shqiptarët thyejnë një tjetër rekord, sa i takon fenomenit të emigrimit. Këtë herë, rekordi është shënuar në Irlandën e largët, ku shqiptarët mbajnë stafetën e listës së personave që u është refuzuar hyrja në territor.
Këto të dhëna janë publikuar nga gazeta The Journal.ie dhe përfshijnë vetëm refuzimet në kufirin brenda aeroportit.
Kështu, në artikull shkruhet se nga 3500 refuzime të emigrantëve që janë ndaluar të kalojnë kufirin, 487 u janë dhënë shtetasve shqiptarë, të ndjekur nga brazilianët (459), gjeorgjianët (365), kurse më larg gjenden bolivianët dhe afrikanët jugorë.
Këto refuzime kanë pasur të bëjnë kryesisht me mungesën e dokumentacionit, por edhe nga precedentët penalë të personave në fjalë.
Së fundmi, Irlanda po zbulohet nga shqiptarët si një destinacion gjithmonë e më shumë i preferuar për të ndërtuar një jetë të re. Duhet thënë se shumë prej shqiptarëve e shfrytëzojnë pikërisht Irlandën is një ‘urë kalimi’ për në Angli.
