Dhjetëra qytetarë janë mbledhur sot para Kryeministrisë për të protestuar kundër aktivitetit naftëkërkues në Zagori, si dhe kundër ndërtimit në HEC-it na Kanionin e Holtës.
Ambientalistë, qytetarë, aktivistë të Shoqërisë Civile por edhe artistë u bënë bashkë sot për të kundërshtuar ndërhyrjet në këto dy zona me vlerë të madhe natyrore, por që rrezikojnë për shkak të ndërhyrjeve si naftëkërkimi apo ndërtimi i HEC-it.
Në duar ata mbanin flamuj kombëtarë dhe pankarta të ndryshme, me mesazhe mjaft domethënëse, si: “Mos ma prek Zagorinë”, “Jo HEC-eve në Holtë”, “Thuaji jo naftës në Parkun Natyror Zagori”, apo “Zagori e Holtë janë Shqipëri. Jo naftës e HEC-eve”.
Kryeministri Rama njoftoi dy ditë më parë se atë që e cilësoi një ‘lajm inkurajues’, teksa njoftoi se të dhënat flasin për një rezervë të madhe gazi e nafte në Shpirag.
Ndërkohë, dje pati protesta nga banorët që kundërshtonin në ndërhyrjen e Zagorit, gjë që solli reagimin e Ramës dhe drejtorit të kompanisë SHELL.
Këta të fundit dhanë garancinë që nuk do të ndërhyhet në zonën e mbrojtur dhe se nuk do të ketë asnjë aktivitet kërkimi për naftë apo gaz.
Nga ana tjetër, banorët kanë reaguar sërish duke thënë se në fakt, ndryshe nga këto qëndrime, në Zagori po kryhen ndërhyrje që po tentohet të mbahen të fshehta.
Ndërkaq, dje Akademia e Shkencave organizoi një forum me ambientalistët që shprehën shqetësim për projektin./ TIRANA TODAY
