Jetoi 4 vite në një anije të braktisur, historia e marinarit Muhamed Aisha

Më 22 prill, një marinar sirian u rikthye më në fund në shtëpinë e tij pasi kaloi 4 vite në një anije tregtare të braktisur në Gjirin e Suezit, pa energji elektrike dhe ujë të pastër, për shkak të një sërë rrethanash që nuk janë edhe aq të rralla në botën e tregtisë detare.

Anija ishte bllokuar gjatë njërit prej udhëtimeve pasi nuk po respektonte disa rregulla të sigurisë. Meqë as kapiteni i anijes dhe as pronarët e saj nuk kishin qenë në gjendje apo nuk donin ta zgjidhnin problemin, ajo u braktis në mesin e një situate të paqartë që vazhdon ende sot.

Dhe meqenëse një gjykatë e kishte caktuar atë si kujdestarin ligjor të anijes, marinari nuk mund të largohej prej saj. Situata e marinarit Muhamed Aisha, u zgjidh përfundimisht vetëm kur Federata Ndërkombëtare e Punëtorëve të Transportit, arriti të bindë autoritetet që ta  zëvendësonte.

Gjithsesi, problemi i anijeve të mëdha që braktisen duke lënë të bllokuar ekuipazhin e tyre është larg zgjidhjes. Sipas Organizatës Ndërkombëtare të Punës, një agjenci e Kombeve të Bashkuara që merret me drejtësinë sociale, aktualisht janë250 raste të anijeve të braktisura me njerëz brenda në bord.

Në vitin 2020, rastet e reja – 85 në total – u dyfishuan krahasuar me vitin 2019. Në këtë rast, historia e Muhamed Aisha është shumë më e pazakontë. Ajo u raportua nga BBC gjatë ditëve kur Kanali i Suezit ishte nën vëmendjen e mediave ndërkombëtare për shkak të bllokimit të kanalit nga anija gjigante e kontejnerëve“Ever Given”.

Gjithçka filloi në Xhedah të Arabisë Saudite më 5 maj 2017, kur Aisha me origjinë nga Tartus, një qytet sirian buzëdetit Mesdhe iu bashkua ekuipazhit të anijes tregtare “MV Aman” si oficeri i parë. Vetëm 2 muaj më vonë anija u bllokua nga autoritetet egjiptiane në portin e vogël të Al Adabija, afër grykës së Kanalit të Suezit pasi kishin skaduar çertifikatat e saj të sigurisë.

Situata mund të zgjidhej lehtësisht, por pronari libanez i anijes refuzoi të paguante kostot e nevojshme të karburantit, dhe kompania me seli në Bahrein që zotëronte anijen ndodhej në vështirësi financiare. Por për autoritetet egjiptiane, ishte e nevojshme të identifikohej një person qëishte ligjërisht përgjegjës dhe që të qëndronte në bordin e anijes.

Kapiteni i anijes – një egjiptian – ishte në breg, dhe për këtë arsye u zgjodh Aisha, që ishte anëtari i ekuipazhit me pozitën më të lartë. Në fillim Aisha nuk e kuptonte se për çfarë bënte fjalë urdhri i gjykatës. Vetëm disa muaj më vonë, kur anëtarët e tjerë të ekuipazhit filluan të largoheshin, e zbuloi që nuk mund të largohej nga anija nëse ajo nuk i shitej dikujt tjetër apo nëse vendin e tij nuk e zinte dikush tjetër.

Ndërkohë, autoritetet egjiptiane i mbajtën pasaportën e tij siriane. Që nga ai moment pasuan disa vite që nuk kanë qenë të lehta për Aishan. Në gushtin e vitit 2018, ai mori lajmin e  vdekjes së nënës së tij, por nuk mundi të merrte pjesë në funeralin e saj.

Një vit më vonë marinari mbeti krejtësisht vetëm në “MV Aman”, pa karburant dhe për rrjedhojë pa energji elektrike. Askush nuk po i paguante rrogën, dhe gjendja e tij psikologjike vazhdoi të përkeqësohej. Ai i tha BBC se natën anija i dukej si një varr.

Jeta në anije ishte e pashëndetshme, pasi përveç mungesës së energjisë elektrike dhe ujit të rrjedhshëm, kishte minj, miza dhe mushkonja, që ishin të shumta në disa periudha. Një mjek që e vizitoi atë kohët e fundit tha se Aisha kishte simptoma të njerëzve që janë burgosur për vite në gjendje të keqe:ai ishte e keq-ushqyer dhe anemik, dhe kishte dhimbje në këmbë.

Me kalimin e kohës, kushtet në anijen “MV Aman” u përkeqësuan,dhe sot anija është e rrënuar. Në marsin e vitit 2020, një stuhi bëri që anija të zhvendosej për 8 kilometra, derisa u përplas disa qindra metra nga bregu, afër qytetit të Adabija.

Aisha kujton se ishte shumë i frikësuar gjatë kohës që anija po lëvizte në mënyrë kaotike, por në fund mendoi se stuhia ishte “një akt i Zotit”, pasi e afroi atë mjaftueshëm pranë bregut për t’i dhënë mundësi të notonte deri në breg për të rimbushur telefonin e tij dhe për të blerë furnizime ushqimore.

Gjithsesi zbritjet e tij në tokë mund të zgjasnin maksimumi 2 orë, pasi zona afër anijes është një zonë nën kontrollin e ushtrisë. Kompania që ka në pronësi “MV Aman”, Tylos Shipping and Marine Services, i tha BBC se ishte përpjekur përgjatë viteve ta ndihmonte Muhamedin, por nuk mund ta bënte dot këtë, pasi nuk mund t’u kërkonin autoriteteve egjiptiane që t’i hiqnin statusin e tij të kujdestarit ligjor.

Federata Ndërkombëtare e Punëtorëve të Transportit u përpoq për muaj të tërë të bindte kompaninë të zgjidhte hallin e Aishës. Tani ky i fundit ia ka dalë më në fund të rikthehet në familjen e tij,dhe pavarësisht nga përvoja e tmerrshme që ka pasur, thotë se dëshiron të rifillojë punë e tij si marinar.

Ndërkohë,25 marinarë indianë të anijes “Ever Given”, rrezikojnë të kenë një fat të ngjashëm. Anija është aktualisht në Liqenin e Madh të Hidhur, një nga zonat në zgjerim të Kanalit të Suezit. Autoritetet egjiptiane e kanë sekuestruar në pritje të një zgjidhje në favor të Egjiptit, për shkak të dëmit të shkaktuar nga bllokimi i trafikut që shkaktoi anija pak javë më parë.

Burimi i lajmit: https://www.ilpost.it/2021/04/25/marinaio-siriano-nave-abbandonata-egitto/

Përshtatur nga TIRANA TODAY