Tridhjetë e nëntë vjeçari, Emmanuel Macron, është një bankier që s’kishte marrë pjesë ndonjëherë në zgjedhje. Por, që sot triumfoi duke u bërë president i ri i Francës përballë Marine Le Pen.
Macron është bir i dy mjekëve. Është rritur në qytezën e Amiens dhe ndoqi shkollën jezuite në qytetin e tij përpara se të lëvizte në Paris, ku përfundoi Liceun Henry –IV dhe shkollën politike “Science Po”.
Fitues i një çmimi në piano, ai mban Master në filozofi, çka reflektohet edhe në fjalimet e tij dhe ka qenë asistent i filozofit të njohur Paul Ricoeur.
Ashtu si presidenti François Hollande, ka ndjekur studimet në ENA, shkollën franceze për nëpunësit e ardhshëm civilë dhe udhëheqësit politikë, duke u renditur në 15 të parët e diplomuar të një klase që përmbante një varg figurash që do të merrnin rolet kyçe politike në Francë.
Pasi mori postin prestigjioz në drejtim të Thesarit francez, Macron shërbeu si zëvendësraportues për komisionin për të përmirësuar rritjen ekonomike franceze të drejtuar nga Jacques Attali, një ish-këshilltar i presidentit Mitterrand, i kishte parashikuar se kishte “elementë presidencialë”.
Por, në vitin 2008 Macron u largua nga shërbimi civil për t’iu bashkuar bankës “Rothschild”, duke u bërë shumë shpejt ortak dhe duke ndihmuar në nënshkrimin e një marrëveshje multi –miliardere mes “Nestle” dhe “Prizer”, tek e cila thuhet se përfitoi rreth 2 milionë euro.
Në vitin 2014, presidenti Hollande e bëri ministrin më të ri të ekonomisë në Francë që prej kohës së Valery Giscard d’Estaing. Verën e kaluar u largua për të formuar partinë e tij. Macron është i martuar me të divorcuarën Brigitte, një trashëgimtare e një linje çokollatash, e cila është rreth 24 vjet më e madhe se ai, një marrëdhënie që ka intriguar publikun francez.
Macron ishte vetëm 15 vjeç kur u takua me Brigitte Trogneux, atëherë mësuese e martuar, që punonte në shkollën e mesme në Francën veriore, e cila kishte tre fëmijë. Prindërit e Macron e dërguan atë në Paris në mënyrë që ta distanconin djalin e tyre nga mësuesja e klubit të dramës, por lidhja e tyre rezistoi, derisa Brigitte u divorcua, dhe 10 vjet më parë ajo u martua me Macronin.
Ajo ka tre fëmijë nga martesa e saj e parë dhe shtatë nipër e mbesa. Zonja Macron luan një rol të rëndësishëm tek burri saj, duke ofruar mbështetje dhe duke ndihmuar në ndryshimin e fjalimeve.
