Në prag të sfidës me Spanjën dhe Italinë lojtarët e kombëtares kanë zhvilluar ndeshje të një niveli të mirë me ekipet e tyre respektive në kampionatet përkatëse. Duket se Shqipëria do të përfaqësohet denjësisht nga çunat e kombëtares dhe se janë të gatshëm për ti mbyllur sa më mirë këto elememinatore të Botërorit Rusi 2018.
Vlen të përmendet paraqitja e mirë që ka bërë portieri Berisha në përballjen e fortë që kishte me kampionët e Serie A, Juventus. Ai ka qënë protagonist në disa pritje deçizive ndaj Higuain e Dybala, ku këtij të fundit i priti edhe një 11-metërsh. Edhe portieri i Lazios, Strakosha ka bërë një paraqitje shumë pozitive në fitoren 6-1 ndaj Sasuolos, ku u ndëshkua vetëm nga penalltia e ekzekutuar nga Berardi.
Memushaj e Gjimshiti kanë shkëlqyer me ekipin e Beneventos edhe pse janë mundur nga Inter. Vlenë për tu përmendur ajo traversë e Memushajt dhe mbulimi perfekt që i bën Gjimshiti yllit argjentinas Ikardit, që nuk pati mundësinë të shfaqet asnjëherë rrezikshëm.
Jahmir Hyka protagonist absolut në fitoren e San Jose. Sulmuesi i Kombëtares Shqiptare ka treguar një formë shumë të mirë teksa ndihmoi skuadrën e tij të merrte tre pikë shumë të rëndësishme në përballjen kundër Portland Timbers. Hyka ishte një ndër më të mirët për skuadrën e San Jose duke krijuar raste të rrezikshme. Ishte pikërisht 29-vjeçari ai që dhuroi asistin e golit të avantazhit për skuadrën e tij . Ndërsa në minutën e 21 pati një rast shumë të mirë për të shënuar, por gardiani i Portalnd, Atinnella u tregua pozicional dhe pas tij ishte shtylla që nuk e lejoi Hykën ta ndalte topin në fundin e rrjetës.
Cikalleshi ka shënuar për ekipin e tij Osmanlispor dhe i ka dhuruar tre pikët e para në këtë kampionat, por që siguroi edhe rikthimin në kombëtare pas një pauze që i bëri Panucci. Taulant Xhaka është rikthimi tjetër që vjen mbas një kohe të gjatë, ai ka qënë një ndër më të mirët për ekipin e Basel, si në ndeshjet e zhvilluara në kampionat ashtu edhe në Champions League. Edhe bomberi elbasanas Armando Sadiku ka shkëlqyer tek Legia ku i janë dashur vetëm 5’ minuta pas aktivizimit që të gjente rrugën e rrjetës.
Arlind Ajeti tek Crotone po kalon një formë mjaft të mirë, pas atij sezoni zhgënjyes tek Torino. Qendërmbrojtësi ka disa javë që shkëlqen në kampionatin italian. Edhe këtë javë në përballjen me Spal ka dhënë mjaft mirë kontributin e tij për barazimin e marrë 1-1 në ndeshjen e zhvilluar jashtë. Ndërsa Mërgim Mavraj ka qëndruar në stol për 90’ minuta në përballjen që Hamburg kishte me Werder Bremen, e cila u mbyll në barazim pa gola.
Balliu lojtari më i ri në kombëtare pritet të debutojë me Spanjën. Por kjo ndeshje do të jetë e veçantë për Balliun pasi ai është lindur në krahinën e katalonjës dhe është duke e përjetuar keq gjendjen që po kalon qytetarët e tij.
/Tirana Today/
