Kjo është javë vendimtare për të ardhmen e Lionel Mesit. Sulmuesi i Argjentinës për momentin konsiderohet futbollist i lirë dhe pa kontratë.
Barcelona dhe lojtari kanë arritur marrëveshjen për të rinovuar sërish për 5 vite, por kjo kontratë nuk mund të përfshihet në La Liga, sepse katalanasit nuk kanë në rregull bilancet ekonomike.
Kontrata e re
Mediat spanjolle bënë të ditur fillimisht, se lojtari do të firmoste për 2 vite dhe pastaj do të shkonte në Amerikë për të luajtur me Majemin. Ky opsion nuk përjashtohet, pasi Mesi mund ta prishë kontratën me Barcelonën, por ideja paraprake është firma për 5 vite.
Një tjetër detaj, është përgjysmimi i rrogës nga ana e kapitenit argjentinas. Kriza ekonomike e detyron klubin që të mos bëjë shpenzime të çmendura dhe Mesi në sezonin e parë do të përfitojë vetëm 20 milionë euro.
Ai do të ketë edhe një premio në momentin që hedh firmën në kontratë, por në sezonin e dytë, Mesit do t’i rritet rroga në mënyrë të menjëhershme dhe në fund do të ketë një klauzolë që ai mund të largohet.
