Gazetari Artan Hoxha mendon se ngjarja e Kavajës nuk ka lidhje me një “histori pasioni”, por me prishje të pazareve. Sipas tij, Marsida e cila është e përfshirë në këtë ngjarje, mbetet në rrezik. Shumë dyshime janë ngritur gjatë ditëve të fundit lidhur me ngjarjen në Kavajë, ku mbeti i vdekur Dritan Haxholli dhe u plagos Dritan Toçi në banesën e Marsida Qatjas. Fakti që viktima Haxholli ishte një person problematik dhe i kërkuar nga policia, dhe i plagosuri Toçi ishte efektiv policie, të dy të njohur me njëri-tjetrin, ka bërë që të mendohet se kjo vrasje mund të mos ketë asnjë lidhje me Marsida Qatjan, e cilësuar si “mollë sherri”.
Këtë ka thënë edhe gazetari i njohur Artan Hoxha, teksa shprehet i bindur se ngjarja nuk ka të bëjë me një femër, por me një aferë kriminale ose prishje pazaresh. Për këtë arsye, ai thotë se jeta e Marsida Qatjas është në rrezik, pasi vetëm ajo e di se çfarë ka ndodhur brenda banesës së saj. Gjatë analizës së tij, gazetari ka thënë se bashkëshorti i Marsidës është në burg në Gjermani për vrasje. Po sipas tij, i ndjeri dhe i lënduari nuk janë zënë aty për një femër, e ndërsa policia duhet të gjejë se përse janë prishur pazaret.
“Bashkëshorti i asaj vajzës, që është në burg në Gjermani, në Shqipëri ka qenë i dënuar për vrasje. Cili është ai budalla që do shkojë atje, kur e di cili është. Ky grup personash, nuk janë zënë aty për një femër. Janë të përfshirë në një aferë kriminale, për se janë prishur pazaret atë le ta gjejnë. Vajza është në rrezik tani e mbrapa, ajo di motivin e vërtetë për këtë ngjarje. Hetimi po shkon në një rrjedhë tjetër, janë prishje të pazarit. Kjo shpjegon faktin pse ata janë bashkë, pse pozojnë kaq hapur”.
