Episodi ku Marcelo ndalon me dorë topin e krosuar nga Kimmich është duke u diskutuar në shumë media. Braziliani pas ndeshjes u tregua një lojtarë i madh dhe mjaft i drejtpërdrejtë pasi tha se topi ishte prekur me dorë nga ai dhe arbitri mund ta jepte penallti. Këtë episod e ka komentuar edhe ish-lojtari madrilen, James Rodriguez, i cili shënoi para tifozëve madrilen dhe tregoi respekt maksimal duke mos festuar.
“Edhe një herë tjetër bëmë një ndeshje të madhe, por në fund nuk mjaftoi as që të fitonim dhe as të kualifikoheshim. Fatkeqësisht, futbolli është edhe i tillë, por tani nuk kemi pse të demoralizohemi dhe të mendojmë për finalen e Kupës së Gjermanisë. Tifozëria e Realit më duartrokiti? Ishte diçka e bukur sepse kjo do të thotë që kam bërë gjëra të mëdha. Prekja me dorë e Marcelos? Unë nuk e pashë qartë, por fundja nuk është faji i Marcelos dhe i asnjë lojtari tjetër, nëse të tilla episode nuk shihen nga ata që janë për këtë punë”, u shpreh ylli kolumbian.
