Ministrja për Dialog e Kosovës, Edita Tahiri informoi BE-në për ndalimin e ish-presidentes Atifete Jahjaga për të marrë pjesë në festivalin kulturo-artistik, shqiptaro-serb, në Beograd. Tahiri ka thënë se Serbia me këtë akt refuzimi, ka shkelur marrëveshjen e Brukselit për lirinë e lëvizjes dhe atë për vizita zyrtare midis dy shteteve.
“Atifete Jahjaga kishte respektuar procedurat zyrtare të parapara në Marrëveshjen e Brukselit dhe se vizita e saj ishte për qëllime kulturore dhe humanitare, për të paraqitur tragjedinë e grave të mbijetuara nga dhunimet seksuale gjatë luftës në Kosovë nga ana e forcave serbe, në një ngjarje kulturore në Beograd”, bëhet e ditur në deklaratën për shtyp të kësaj ministrie.
Për Tahirin, bashkënegociatore në të gjitha nivelet e dialogut Kosovë-Serbi, kjo e fundit “nuk është e gatshme të përballet me të kaluarën e saj agresore dhe gjenocidale ndaj shqiptarëve dhe nuk është e gatshme për paqe, drejtësi dhe marrëdhënie fqinjësore midis dy shteteve.
Jahjaga pritej të promovonte librin e saj “Unë dua të dëgjohem”, në kuadër të festivalit “Mirëdita, dobar dan!”, që do të shoqërohej edhe nga një fjalim për viktimat e dhunës seksuale gjatë luftës në Kosovë.
Mediat serbe prej ditësh e kanë konsideruar këtë misionin të Jahjagës, si një “përdhunim të Beogradit” çka mesa duket ka ndikuar jo pak në vendimmarrje e autoriteteve zyrtare për të ndaluar hyrjen e saj në Serbi.
