Masakra e rëndë me tetë të vrarë, tronditi mbarë opinionin publik. Dje 24-vjeçari ka shfaqur sjellje të ftohtë dhe pa asnjë nuancë emocionale, duke parë në sy çdonjërin prej gazetarëve. Ajo që u dallua nga të gjithë, ishte syri i djathtë i tij i ënjtur dhe i nxirë. Para trupit gjykues, Ritvan Zykaj ka thënë vetëm një fjali të vetme: “I vrava se ata më akuzonin mua për grabitjet e pulave”.
Policia: Nuk e kemi dhunuar
Uniformat blu mohojnë që autori i aktit makabër të jetë dhunuar në ambientet e saj, duke pohuar se kjo mund t’i ketë ndodhur gjatë momenteve të arratisë. Dyshohet se ai mund të jetë rrëzuar, apo përplasur në tentativë për t’u shpëtuar prangave.
Gjykata ndërkaq e ka kryer seancën me dyer të mbyllura, duke mos lejuar askënd të jetë i pranishëm. Në ambientet e gjykatës, është parë vetëm një djalë i ri, i cili pohoi se ishte i afërm me viktimat. Por ai nuk u la të futej në sallë. Askush tjetër, as familjarët e autorit, nuk janë parë dje në Gjykatën e Vlorës.
“Të varet në mes të sheshit”, ishin thirrjet e qytetarëve jashtë ambienteve të gjykatës, në momentin që furgoni i policisë solli të arrestuarin, për masën e sigurisë.
Mbi 15 avokatë kanë refuzuar ta përfaqësojnë atë. Siç mësohet, ka negociuar vetë kreu i gjykatës së këtij rrethi, derisa është caktuar kryesisht avokati Renato Mehmetaj, duke vonuar kështu rreth 15 minuta nga koha e përcaktuar për nisjen e seancës.
Prokurori Sajmir Smaka i ka vënë në dispozicion gjykatës provat dhe dëshminë e të arrestuarit, dhe më pas ka kërkuar masën e sigurisë “arrest në burg”, gjë e cila ka marrë edhe miratim nga gjyqtarja Esmerilda Habilaj. Një ditë më parë, Gjykata e Vlorës caktoi masën e sigurisë “burg pa afat” për 24-vjeçarin Ritvan Zykaj, i akuzuar për tetë vrasje.
I sëmurë mendor?
Nisur nga veprimet e kryera, ekspertët dyshojnë se nuk kemi të bëjmë me një të sëmurë mendor, por një njeri të frustruar me tipare të theksuara kriminale, dhe person që kërkon qendrën e vëmendjes me krimet e tij.
Kjo e shpjegon edhe faktin që ndërsa ishte në arrati, ai futet online në Facebook dhe nis të komentojë krimin, duke fyer miqtë virtualë që e mallkonin për ngjarjen e rëndë. Pas arrestimit, në vend të pendesës, ai shfaqte krenarinë. Ato pak fjalë që ka thënë para hetuesve ishin: “I vrava sepse më akuzonin se kisha vjedhur, nuk i duroja dot më. Armën e kisha fshehur te kasollja e bagëtive. Por ju policët më kapët shumë vonë”.
