Dështoi mbledhja e qeverisë së Kosovës për miratimin e projektligjit të demarkacionit. Në sallë janë paraqitur vetëm disa ministra të LDK-së, ata të Listës Serbe, por jo ata të PDK-së. Bashkëpunëtorë të Mustafës kanë thënë se mbledhja është shtyrë për ditën e mërkurë.
Isa Mustafa dhe Kadri Veseli nuk po arrijnë në marrëveshje për procedimin e demarkacionit në Kuvend. Kryesia e Kuvendit tashmë ka caktuar një seancë ku do të votohet për rrëzimin e Qeverisë. Kjo seancë do të mbahet të mërkurën. I vetëdijshëm se karrigia mund t’i lëkundet, Mustafa po përpiqet ta evitojë këtë skenar. Ai po kërkon që së pari të votohet mocioni i opozitës, duke llogaritur që PDK-ja nuk do të votonte kundër Qeverisë pa u votuar Demarkacioni, pasi në këtë mënyrë subjekti që drejtohet nga Kadri Veseli, do të mbetej fajtor që Demarkacioni nuk është votuar në Kuvend. Por, pa arritur situata deri këtu, Veseli ka ndërmarrë një veprim tjetër, duke ia kërkuar Mustafës 33 nënshkrime të deputetëve të LDK-së, si një lloj garancie se Demarkacioni do të votohet kur të hidhet në votim. Në këtë mënyrë ministrat e PDK-së do të jepnin mbështetjen e tyre në Qeveri që Demarkacioni të shkojë në Kuvend. Ndërkohë, Veseli ka thënë se edhe ai do t’i deponojë nënshkrimet e subjektit të tij.
