Këtë vit pritet që Shqipëria të prezantohet në festivalin e madh europian ‘Eurovision’, nga këngëtarja Jonida Maliqi. Ajo do të këndojë në pjesën e dytë të natës së dytë gjysmëfinale, në datën 16 maj.
“Ktheju Tokës” është një këngë mjaft e ndjerë për jetën e shqiptarëve, që janë dashur të përballen me emigracionin. Po kështu, vetë këngëtarja ka konfirmuar se këngën do ta mbajë në gjuhën shqipe, duke qenë se dhe vetë muzika përmban shumë elementë tradicionalë shqiptarë.
Kënga është pritur shumë mirë edhe nga publiku i huaj, dhe ka marrë mjaft vlerësime pozitive, duke e cilësuar shpeshherë edhe si një kryevepër. ‘Eurovision’ do të organizohet në Tel Aviv të Izraelit, për të shpallur fituesin mes 42 vendeve konkurruese në 18 maj.
