“BE-ja nuk do të pranojë të importojë mosmarrëveshjet dhe paqëndrueshmërinë që mund të sjellin Serbia dhe Kosova. Ende ekzistojnë mosmarrëveshje të rëndësishme dypalëshe midis vendeve të rajonit të cilat mbeten për t’u zgjidhur para integrimit në BE”, thuhet në dokumentin e Komisioni Evropian.
Nesër KE-ja pritet të paraqesë Strategjinë për Zgjerimin me vendet e Ballkanit Perëndimor. Dokumenti, një kopje të të cilit e ka siguruar Zëri i Amerikës, ripërcakton nga njëra anë detyrimet kryesore që vetë vendet e rajonit duhet të përmbushin, me përqendrim të veçantë në Shtetin ligjor dhe zgjidhjen e mosmarrëveshjeve dypalëshe mes tyre, ndërsa nga ana tjetër, flet për një angazhim në rritje të vetë Bashkimit Evropian për t’i mbështetur më shumë këto vende në rrugëtimin e tyre.
Për Bashkimin Evropian ka një rëndësi të dorës parë që vendet e rajonit të kenë lënë pas të gjitha problemet mes tyre, përmes zgjidhjeve përfundimtare para anëtarësimit në BE.
Në dokument përmendet specifikisht situata mes Serbisë dhe Kosovës. “Pa një normalizim efektiv dhe gjithëpërfshirës të marrëdhënieve Beograd-Prishtinë nëpërmjet dialogut të lehtësuar nga BE-ja, nuk mund të ketë stabilitet të qëndrueshëm në rajon. Një marrëveshje gjithëpërfshirëse dhe normalisht e detyrueshme për normalizimin është urgjente dhe vendimtare në mënyrë që Serbia dhe Kosova të përparojnë në rrugët e tyre evropiane”.
Udhëzimet e BE-së janë të qarta, Serbia nuk mund të anëtarësohet në Bashkimin Evropian nëse nuk i jep një zgjidhje përfundimtare problemeve që ka me Kosovën.
