Disa nga familjet më të pasura të botës kanë nënshkruar një pakt për të investuar pasuri të tyre në funksion të përmirësimit të jetës së të tjerëve.
Grupi “ImPact”, përbëhet nga shumë miliarderë. Është ideuar nga Justin Rockefeller, stërnip i John D. Rockefeller dhe Josh Cohen.
Themeluesit e këtij grupi janë Liesel Pritzker Simmons (trashgimtar i Hyatt Hotels ), Jason Ingle (nipi i Henry Ford) dhe Jim Sorenson (biri i biznesmenit James LeVoy Sorenson).
Ideja është e ngjashme me atë të Bill Gates dhe Warren Buffett, “The Giving Pledge”, që kërkon nga nënshkruesit gjysmën e pasurisë së tyre. Ndryshimi qëndron se investimi duhet të jetë në funksion të së mirës.
“As bamirësia e as ndihmat nuk do të zgjidhin problemet me të cilat bota po përballet sot,” tha CEO, Abigail Noble. “Na duhet të përdorim bizneset dhe kapitalin”.
Noble tha se ajo është përqendruar në bashkëpunimin me “familjet më me ndikim në nivel global”, dhe pikërisht te të rinjtë që vijnë nga këto familje. Ata duan të rrisin investimet e bamirësisë që kanë nisur prindërit dhe gjyshërit e tyre.
Që nga themelimi i ImPact në 2015 në këtë organizim bëjnë pjesë 125 anëtarë. Së fundmi është bashkangjitur edhe Brazili dhe Koreja e Jugut.
Detyrimi moral për të investuar për të mirën
Pakti është një “detyrim moral”, dhe jo një dokument i detyrueshëm ligjor. Nuk është përcaktuar niveli minimal i investimeve, dhe madje ImPact nuk di as se sa është investuar. Anëtarësimi realizohet përmes një ftese dhe Noble tha se pasuria mesatare e familjeve arrin rreth 700 milionë dollarë. ImPact kontrollon performancën financiare dhe ndikimin e investimeve të anëtarëve të saj. Ky informacion ndahet edhe në rrjet.
“Familjet jo vetëm që mund të shohin investimet e tyre, por edhe t’i krahasojnë me investimet e familjeve të tjera dhe të mësojnë si të marrin vendime në mënyrë më efektive”, tha Noble.
Fuqia e bashkimit
Jean Case mbështet “ImPact” përmes fondacionit që ajo dhe burri i saj, Steve Case kanë bashkë themeluar në vitin 1997.
“Ideja e bashkimit të fuqive me anëtarët e tjerë të pasur dhe ndërveprimit pavarësisht se nuk po investohet në të njëjtat gjëra është mjaft të fuqishme”, tha Case.
Ajo tha se të rinjtë e familjeve të pasura po distancohen nga metodat tradicionale të investimit.
Përqindja e individëve që janë të interesuar të investojnë në ImPact u rrit nga 32% në 2015 në 45% në vitin 2017, sipas një studimi të US Trust, departamenti i menaxhimit të pasurisë private të Bankës së Amerikës (BAC).
“Përmes organizimit të pronarëve të pasurive më me ndikim në botë, ne mund ta ndryshojmë këndvështrimin e investimit në funksion të së mirës,” tha Noble.
Përshtati për Tirana Today, Refxhei Tola
