Prestigjiozja britanike “The Sun” ka evidentuar 7 transferimet më të mëdha që mund të kryhen brenda këtij muaji.
Christian Eriksen tek Interi – 17 milionë £
Danezi i Tottenham është ndjekur nga Manchester United, Real Madrid dhe Juventusi, teksa do të jetë i disponueshëm falas gjatë verës. Agjenti i lojtarit u takua dje me drejtuesit zikaltër, në Milano, të cilët i ofruan Eriksen një marrëveshje 4-vjeçare.
Bruno Fernandes te Manchester United – 55 milionë £
Pretendohet se trajneri Ole Gunnar Solskjaer shkoi për ta parë atë, teksa luante kundër Porto dhe është bindur që t’i ofrojë klubit portugez 55 milionë £.
Olivier Giroud tek Interi – 5 milionë £
Raportet mediatike pretendojnë se sulmuesi ka arritur një marrëveshje ribashkimi me ish-trajnerin e bluve të Londrës, Antonio Conte.
Dayot Upamecano tek Arsenali – 50 milionë £
Pretendohet se bosët e “Emirates” do të trokasin sërish për 20-vjeçarin, këtë muaj, me një ofertë prej 50 milionë £.
Tahith Chong te Juventusi – falas
Kampionët italianë po përgatiten t’i ofrojnë sulmuesit të krahut një kontratë prej 35.000 £ në javë dhe një bonus prej 2 milionë £ gjatë nënshkrimit. 20-vjeçari ka bërë vetëm nëntë paraqitje këtë sezon dhe dëshiron të luajë më rregullisht në skuadrën e parë.
Krzysztof Piatek te Tottenham – 28 milionë £
Tottenham është gati t’iu paguajë kuqezinjve një shumë fillestare prej 23.8 milionë £ dhe 4.2 milionë £ të tjera në formë bonusesh.
Ashley Young tek Interi – nuk dihet çmimi
Gjigantët e Serie A mund të bien dakord për një parakontratë me kapitenin e Manchester United këtë muaj, por është kuptuar se skuadra e Premier League do ta evitojë largimin falas gjatë verës së ardhshme. Prandaj, mund të negociojë një tarifë transferimi me Interin.
