Prej disa ditësh studentët shqiptarë janë në protestë. Ata i kanë paraqitur disa kërkesa qeverisë, ku më të rëndësishmet janë ulja apo përgjysmimi i tarifave të shkollimit.
Në vijim, ditët e protestave nxorën në dritë edhe të tjera probleme të studentëve, filluar nga trajtimi jo human nga ana e pedagogëve e shkuar deri tek pagesat që disa nga mësimdhënësit i detyrojnë të kryejnë për të marrë provimet.
Por si mund të rregullohet situata e studentëve shqiptarë?
Ekspertë të ndryshëm mendojnë se zgjidhja e situatës është e mundur, madje pa shumë dhimbje e shpenzime.
Së pari, ekspertët mendojnë se bordet administrative të universiteteve duhet të ndryshojnë përbërjen, nga 4 përfaqësues të qeverisë dhe 3 pedagogë, në formulën e re: 3 pedagogë, 3 studentë dhe 1 përfaqësues të qeverisë. Kjo masë demokratizon vendimmarrjen dhe menaxhimin e të ardhurave.
Së dyti, studentët duhet të jenë pjesëmarrës në proceset e zgjedhjes së dekanëve e rektorëve jo më në masën 10 për qind, por në masën 30 për qind.
Së treti, bursa duhet të jepen vetëm për studentët e ekselencës dhe ata që vijnë nga familje me ndihmë ekonomike, apo për studentë që kanë pamundësi fizike.
Së katërti, pas një studimi, Qeveria duhet të ulë tavanin për pagesat në universitete, pasi tavani aktual është i lartë dhe për më keq, universitete të ndryshme e kanë ngritur tarifën, ndonjëherë abuzivisht, në majë.
Së pesti, qeveria duhet të bëjë një tjetër studim se sa e ka mundësinë që të kompensojë universitetet.
Së gjashti, Qeveria, me anë të një VKM-je, duhet të saktësojë mënyrën se si do të bëhet vetingu i pedagogëve; moral, pasuror e profesional. /TIRANA TODAY
