Ushtria izraelite tha se shkatërroi shtëpinë e një palestinezi të dyshuar për qëllimin me armë të disa izraelitëve në Bregun Perëndimor të okupuar, njëri prej të cilëve më vonë vdiq. Gjatë shkatërrimit së shtëpisë, shpërthyen trazira, kur rreth 200 palestinezë u gjuanin me gurë dhe fishekzjarre ushtarëve.
Në sulmin në fillim të majit, tre studentë fetarë izraelitë, që prisnin në stacionin e autobusit në një kryqëzim në jug të qytetit palestinez Nablus, u goditën me armë zjarri nga një makinë që po kalonte. Një nga izraelitët vdiq në spital. Tri ditë pas sulmit, palestinezi u arrestua. Ai është në burg dhe është akuzuar për vrasje dhe vrasje në tentativë, sipas raporteve të medias.
Sipas raporteve, ai gjithashtu ka një pasaportë amerikane. Një zëdhënës i Ambasadës Amerikane në Izrael tha: “Ne besojmë se është kritike për të gjitha palët të përmbahen nga masat e njëanshme që përkeqësojnë tensionet dhe minojnë përpjekjet për të çuar përpara një zgjidhje të negociuar mes dy shteteve, e cila sigurisht përfshin prishjen ndëshkuese të shtëpive palestineze”.
Izraeli përdor shkatërrimet e shtëpive si një masë parandaluese. Organizatat e të drejtave të njeriut e konsiderojnë këtë dënim kolektiv një shkelje të ligjit ndërkombëtar humanitar. Sidoqoftë, gjykata më e lartë e Izraelit ka autorizuar vazhdimisht prishjen e shtëpive dhe ka hedhur poshtë ankesat kundër tyre.
Izraeli pushtoi Bregun Perëndimor dhe Jeruzalemin Lindor, ndër territoret e tjera, gjatë Luftës Gjashtë Ditore të 1967-ës. Palestinezët, nga ana tjetër, pretendojnë territore për shtetin e tyre, me Jeruzalemin Lindor si kryeqytetin e tyre.
