Kombëtarja shqiptare do të zhvillojë sonte miqësoren me Jordaninë, ndërsa menjëherë pas saj do të fillojnë përgatitjet për ndeshjen me Izraelin të vlefshme për Ligën e Kombeve. Sfida e radhës për kuqezinjtë është vendimtare për ecurinë në këtë kompeticion dhe do të zhvillohet në transfertë.
FSHF në bashkëpunim me Federatën e Izraelit kanë dhënë njoftimin se si mund të sigurojnë tifozët shqiptar një biletë për këtë sfidë e cila do të zhvillohet në Beer Sheva. Po ashtu janë afishuar edhe çmimet dhe sektorët përkatëse, tifozët e interesuar mund të shkojnë në zyrat e FSHF-së për të blerë biletat për ndeshjen.
“Federata Shqiptare e Futbollit njofton të gjithë sportdashësit se ka filluar shitja e biletave për ndeshjen e radhës të kuqezinjve, Izrael-Shqipëri e vlefshme për UEFA NATIONS LEAGUE, ku bëjmë pjesë në Ligën C, grupi i parë. Ndeshja e kthimit Izrael-Shqipëri do të zhvillohet me datë 14 tetor ora 20:45 në stadiumin “Turner Stadium” në qytetin Beer Sheva në Izrael.
Tifozët e kombëtares sonë do të jenë të vendosur në hyrjen numër 9, që i përket miqve si sektor, ku biletat në këtë sektor kushtojnë 22 euro/copa. Po ashtu për tifozat e Shqipërisë do të jetë edhe tribuna numër 2, ku biletat kushtojnë 37 euro/copa. Të interesuarit janë të lutur të paraqiten pranë zyrave të FSHF për të blerë bileta, me kartë identiteti ose pasaportë”-thuhet në njoftimin e FSHF-së
