Pas një starti shumë të dobët, Partizani kthehet tek fitorja dhe thyen akullin e krijuar për shënimin e golave. Trajneri Mark Iuliano është shprehur mjaft i kënaqur me atë që kanë dhënë lojtarët në fushë dhe u shpreh se ka akoma shumë vend për përmirësim. Ai shpreson që dëmtimi i Sukajt të mos jetë serioz dhe të mos e mbajë gjatë larg fushave, pasi është mjaft i rëndësishëm për ekipin. Ka prekur edhe çështjen e Bardhit dhe ka lënë një mesazh mjaft interesant, duke i kërkuar që të mos i rritet mendja dhe të punojë çdo ditë e më fort, pasi do ta ketë shansin të luaj edhe më shumë minuta.
“Ishte një provë e mirë për të gjithë ne. Pres edhe më tepër se kaq, sepse ky nuk është maksimumi. Ishte Partizani im edhe kur humbiste është Partizani im dhe ky tani. Nuk kam pasur dyshime mbi cilësinë e punës tonë. Edhe në momentin kur nuk po shpreheshim mirë, djemtë më kërkuan të vazhdonim këtë rrugë. Skuadra ishte më e shkurtër dhe diferenca nuk ishin të mëdha mes mbrojtës dhe sulmit. Luftëtari nuk na vuri në vështirësi, por kjo është e gjitha merita e Partizanit. Dëmtimin e Sukajt do ta vlerësojmë në vijim, për të mësuar situatën, duke shpresuar të mos jetë dëmtim i gjatë. Sot luajti edhe Basrak, i cili bëri paraqitje të mira dhe krijoi raste, ndërsa për Bardhin kam një mesazh: Do të ketë shansin e tij, nëse nuk i rritet mendja”
Nga ana tjetër, trajneri i Luftëtarit theksoi se humbja më të kuqtë erdhi edhe për shkak të ngërçit psikologjik si pasojë e humbjes me Kamzën.
